Չի կարելի պակասեցնել բնապահպանական ոլորտում հանրային լսումների քանակը: «Առաջին լրատվական»-ի հետ զրույցում նման տեսակետ հայտնեց «Թռչնասերների կենտրոն» ՀԿ ղեկավար Սիլվա Ադամյանը`գնահատելով «Շրջակա միջավայրի վրա ազդեցության փորձաքննության մասին ՀՀ օրենքում փոփոխություններ և լրացումներ կատարելու մասին ՀՀ օրենքի» նախագիծը, որը կներկայացվի ԱԺ արտահերթ քննարկմանը:
«Մենք հայտարարություն կազմեցինք և ուղարկեցինք պատկան մարմիններին` ցանկանալով և՛ նրանց, և՛ հասարակությանը նախազգուշացնել, որ առանց այն էլ մեր երկիրը շատ ծանր վիճակում է. հասարակությունն իր խոսքը չի կարողանում արտահայտել բոլոր գործընթացներում: Հիմա ընդունվել մի նոր օրենք, որի շրջանակներում հասարակության գործողությունները և հասարակության ձայնը կպակասեցվի»,- մեկնաբանեց Սիլվա Ադամյանը`հավելելով, որ այդպես պատ են շարում հասարակության, բիզնեսի և կառավարության միջև:
Նրա համոզմամբ` սա գործընթացները հասարակությունից ծածկելու փորձ է`շրջանցելով հանրության կարծիքը: Սիլվա Ադամյանն ասաց. «Փորձը ցույց է տալիս, որ խնդիրներին, որոնց մենք առնչվել ենք, մասնավորապես՝ հանքարդյունաբերության բնագավառում, բոլոր լսումները ֆիկտիվ են եղել»: Ուստի բնապահպանի կարծիքով`պետք է չեղյալ համարել օրենքը կամ նորն ընդունել, որով հաշվի կառնվի հանրային կարծիքը: