Եվ այսպես, երեկ Հայ ազգային կոնգրեսը փակեց քաղաքական տարին` հայտարարելով, որ հաջորդ հանրահավաքը տեղի կունենա փետրվարին: Կոնգրեսի առաջնորդ Լևոն Տեր-Պետրոսյանն էլ հայտարարեց, որ փետրվար-մարտին նշանակալի իրադարձություններ կարող են սպասվել Հայաստանի քաղաքական կյանքում: Ըստ ամենայնի, տարին փակած կարելի է համարել նաև իշխանության մասով: Դեկտեմբերը երևի թե հանդարտ կանցնի, աղմկոտ պաշտոնանկությունների շարան չի լինի: Հայաստանի քաղաքական կյանքը թերևս «ձմռան քուն» է մտնում, իհարկե՝ գարնանը գերակտիվանալու աներկբա հեռանկարով, որովհետև գարնանը թեժ շրջան է մտնում նախընտրական մթնոլորտը:
Դեռ գուցե վաղ է տարին ամփոփել, սակայն այդուհանդերձ կարելի է ասել, որ այն ընդհանուր առմամբ քաղաքական զիգզագի տարի էր: Գարնանը եղան Հայ ազգային կոնգրեսի գերբազմամարդ հանրահավաքները, եղան որոշակի մարտավարական հաջողություններ քաղբանտարկյալների ազատ արձակման, Ազատության հրապարակում հանրահավաքների վերսկսման առումով: Հետո եղավ երկխոսությունը, որից հետո, սակայն, արձանագրվեց սրընթաց վայրէջք, երկխոսությունը հայտարարվեց անհույս և մերժվեց, իշխանությունը սկսեց կադրային փոփոխություններով մթնոլորտ թելադրել, իսկ տարվա իր վերջին հանրահավաքում էլ Կոնգրեսը հայտարարեց ԲՀԿ-ի հետ համատեղ շարժվելու պատրաստակամության մասին` իհարկե դնելով որոշակի պայմաններ:
Տարվա կտրվածքով ներքաղաքական այդ զիգզագը կամ ոլորանները, հանրության մեջ գլխապտույտից բացի երևի թե ուրիշ բան չառաջացրին: Հայաստանի ներքաղաքական կյանքը մարդկանց համար սկսել էլ ավելի անհասկանալի դառնալ, սկսեցին է՛լ ավելի խորհրդավոր և «իմաստուն» դառնալ ընդդիմության քաղաքական հայտարարություններն ու սխեմաները, իշխանությունը սկսեց գլխապտույտ առաջացնել իր կադրային փոփոխությունների շարանով: Եվ առաջիկայում կարծես թե չի նշմարվում, որ առկա պրոցեսում կգտնվի մեկը, որը կդադարեցնի այդ գլխապտույտը և ներքաղաքական պրոցեսում հասարակությանը պարզ, նրա կյանքին անմիջականորեն մոտ և շոշափելի մեսիջներ կհղի:
Ահա այդ իրավիճակում է ներքաղաքական պրոցեսը մտնում «ձմեռային քուն»՝ հանրության գլուխը պտտեցրին, իսկ իրենք իրենց համար հանգիստ կքնեն, էներգիա կկուտակեն, ու երբ ուր որ է հանրության գլուխը պետք է հանգստանար այդ պտույտներից, կբացվի նախընտրական թեժ շրջանն ու… նորից գլխապտույտ: