Բնապահպանական 11 հասարակական կազմակերպություններ նախօրեին բաց նամակ էին հղել ՀՀ նախագահին, վարչապետին, ԱԺ նախագահի պաշտոնակատարին ու մի շարք այլ պետական գերատեսչությունների, միջազգային կազմակերպությունների հայաստանյան ներկայացուցչություններին` պահանջելով ՀՀ կառավարության նախաձեռնությամբ, նոյեմբերի 28-ին հրավիրված արտահերթ նիստի օրակարգից հանել «Շրջակա միջավայրի վրա ազդեցության փորձաքննության մասին ՀՀ օրենքում փոփոխություններ և լրացումներ կատարելու մասին ՀՀ օրենքի» նախագիծը:
Ի պատասխան բնապահանների առաջարկին` ՀՀ բնապահպանության նախարարության մամուլի ծառայությունը հաղորդագրություն է տարածել.
«ՀՀ կառավարությունն Ազգային ժողով է ներկայացրել «Շրջակա միջավայրի վրա ազդեցության փորձաքննության մասին» ՀՀ օրենքում փոփոխություններ և լրացումներ կատարելու մասին» ՀՀ օրենքի նախագիծը:
«Շրջակա միջավայրի վրա ազդեցության փորձաքննության մասին» ՀՀ օրենքն ընդունվել է 1995թ. : Հետագա տարիներին, հասարակական զարգացումների հետևանքով, որոշ դրույթներ բավարար չափով չեն արտահայտում ներկա իրավահարաբերությունները:
Առաջացրել էր նոր իրողություններին համապատասխանեցնելու և նոր պահանջներ սահմանելու անհրաժետություն: Օրենքի բարելավվման հիմնական նպատակադրումն եղել է շրջակա միջավայրի պահպանության և գործարար միջավայրի բարելավման գործողությունների համամասնությունների սահմանումը»: