Ժողովուրդը չի մասնակցի ՀԱԿ-ԲՀԿ «հարսանիքին»: «Առաջին լրատվական»-ի հետ զրույցում նման տեսակետ հայտնեց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը`խոսելով ՀԱԿ-ԲՀԿ հնարավոր համագործակցության, հասարակության վերաբերմունքի և հասարակության կողմից համագործակցության արձագանքի շուրջ:
Ըստ Ա. Ադիբեկյանի` ամիսներ առաջ անցկացված հարցումների արդյունքում հասարակությունն ամենահզոր կապը տեսնում է ՀՀԿ-ի և ԲՀԿ-ի կողմնակիցների, ՀՀԿ-ի և ԲՀԿ-ի միջև: «Նույն մակարդակի են նաև ՀԱԿ-ի և «Ժառանգության» միջև կապերը, բայց զիջողականությունը բավականին մեծ է»,- մեկնաբանեց Ա. Ադիբեկյանը`իր սեփական կարծիքը հայտնելով. այդ համագործակցությունը վճռորոշ չէ:
Սոցիոլոգի կանխատեսմամբ` ՀԱԿ-ԲՀԿ համագործակցությունը ՀԱԿ-ին ավելի մեծ օգուտ կբերի, քան ԲՀԿ-ին: Ահարոն Ադիբեկյանը նշեց, որ ԲՀԿ կողմնակիցների ցուցակը գլխավորում են հանրապետականները: Երկրորդ տեղում, ըստ սոցիոլոգի, ՀՅԴ-ն է, երրորդը`«Ժառանգությունն» է, ՀԱԿ-ն ու ՕԵԿ-ը չորրորդ տեղում են: Սոցիոլոգի համոզմամբ` ամեն առաջարկ չէ, որ իրական է:
Անդրադառնալով քաղաքական գործընթացներում հասարակության արձագանքին`նա շեշտեց, որ հեշտ չէ ընտրողներին մի դիրքից տեղափոխել մեկ այլ դիրք: «Ժողովուրդը պանիր կամ շաքարավազ չէ, որ մի պարկից վերցնեն և լցնեն մյուսը: Ժողովուրդը պետք է հետևի և որոշի ընդունո՞ւմ է նման քաղաքական ամուսնությունը, թե՞ ոչ: Եթե ընդունում է, կմասնակցի նրանց «հարսանիքին», եթե ոչ՝ «հարսանիքին» չեն մասնակցի»,- փոխաբերությամբ մեկնաբանեց Ա. Ադիբեկյանը`ընդգծելով, որ ԲՀԿ հետ ավելի հաջող «հարսանիք» կանեն հանրապետականները, «Ժառանգությունը», ՀՅԴ-ն, ՕԵԿ-ը, իսկ վերջին տեղում ժողովուրդը տեսնում է ՀԱԿ-ին:
Հարցին՝ ժողովուրդը կմասնակցի՞ ՀԱԿ-ԲՀԿ «հարսանիքին», Ահարոն Ադիբեկյանը պատասխանեց՝ ոչ: