Ֆուտբոլային ֆանատները խոստացել են Մոսկվայի փողոցներ հանել մի քանի տասնյակ հազար մարդ: Այս մասին գրում է ռուսական Коммерсант թերթը: Նրանք վերջնագիր են ներկայացրել իշխանություններին` պահանջելով կանգնել իրենց կողմը կովկասցիների դեմ պայքարում: Այլապես նրանք փողոց կհանեն մինչև 50 հազար մարդ:
Ֆուտբոլային երկրպագուների խմբերից մեկի ղեկավարը թերթին ասել է, որ եթե մոտ ժամանակներս իշխանությունները ելույթ չունենան, անմիջապես միջոցառումներ ձեռք չառնվեն, համայնքների ներկայացուցիչները չկանչվեն բացատրություններ տալու, ապա ազգայնականների ելույթները կշարունակվեն, իսկ «Մանեժնայա» հրապարակի և Կիևյան երկաթուղային կայարանի մոտ տեղի ունեցածը չնչին բան կթվա: Այս մասին գրում է Коммерсант-ը:
Ռուսաստանի իշխանոթւոյւնները դեռ կարծիք չեն հայտնել այս իրադարձությունների վերաբերյալ: Միայն նախագահ Մեդվեդևն է երկու անգամ Twitter- ում գրառում կատարել, որ ամեն ինչ հանգիստ է, հանգիստ քնեք, իսկ մեղավորները կպատժվեն: Այսօր սպասվում է, որ հեռուստատեսային հարց ու պատասխանի ժամանակ վարչապետ Պուտինը կանդրադառնա Մոսկվայում և այլ քաղաքներում տեղի ունեցած բախումներին և ազգայնական ելույթներին:
