Երեկ բնապահպանական կազմակերպությունները և քաղաքացիական նախաձեռնությունները հայտարարություն են տարածել:
Այն ուղարկվել է ՀՀ նախագահ Ս. Սարգսյանին, ՀՀ վարչապետ Տ. Սարգսյանին, ՀՀ Ազգային ժողովի նախագահի պաշտոնակատար Ս. Նիկոյանին, ՀՀ Ազգային ժողովի գյուղատնտեսական և բնապահպանական հարցերի մշտական հանձնաժողովի նախագահ Խ. Հարությունյանին,
ԵԱՀԿ երևանյան գրասենյակ, ՀՀ Բնապահպանության նախարար Ա. Հարությունյանին: Սույն հայտարարությանը միացել են Էկոլոգիական հասարակական դաշինքը,
«Սոս Սևան» նախաձեռնող խումբը, Հրազդանի երկաթահանքի շահագործման դեմ պայքարող նախաձեռնող խումբը, «Չենք լռելու» նախաձեռնությունը
«Ընդեմ կամայական կամայականությունների» ՀԿ-ն,
«Փրոփուս» ՀԿ-ն, «Սոնա-Դալմա» հիմնադրամը
«Հետաքննող լրագրողների» ՀԿ-ն և«Էկոդար» ՀԿ-ն:
Հայտարարության մեջ մասնավորապես ասված է, որ ՀՀ կառավարության նախաձեռնությամբ, սույն թվականի նոյեմբերի 28-ին հրավիրված արտահերթ նիստի ժամանակ քննարկվելու է նաև «Շրջակա միջավայրի վրա ազդեցության փորձաքննության մասին ՀՀ օրենքում փոփոխություններ և լրացումներ կատարելու մասին ՀՀ օրենքի» նախագիծը:
Բնապահպաններն արձանագրում են, որ նշված նախագիծը ՀՀ Ազգային ժողովի քննարկմանն է ներկայացվել ՀՀ կողմից վավերացված Օրհուսի և Էսպոյի կոնվենցիաների, ինչպես նաև ՀՀ ազգային օրեսնդրության պահանջների բացահայտ ու կոպիտ խախտումներով: Ըստ նրանց` չի ապահովվել վերոնշյալ կոնվենցիաներից բխող ընթացակարգերը, հասարակությունը զրկվել է իր հիմնարար իրավունքները իրագործելու հնարավորությունից, չի ապահովվել «Իրավական ակտերի մասին» ՀՀ օրենքի 27.1 հոդվածով և ՀՀ կառավարության 25.03.2010թ. «Հանրային քննարկումների կազմակերպման և իրականացման կարգը հաստատելու մասին» N 296-Ն որոշմամբ սահմանված, նախագծի քննարկման գործընթացում հանրության մասնակցությունն ապահովելու ընթացակարգը:
Ներկայացված նախագիծը, բնապահպանական հասարակական կազմակերպությունների կարծիքով, ամբողջությամբ թերի է: Այն չի ապահովում հասարակության պատշաճ ծանուցման, ձեռնարկողի/ներկայացնողի կողմից ՇՄԱԳ/ՌԷԳ իրականացման և դրանում հասարակության նախնական փուլում պատշաճ ներգրավման ու հասարակության կարծիքի հաշվի առնելու հարցերը, չի ծառայում շրջակա միջավայրի վրա ազդեցության փորձաքննության հիմնական նպատակի իրականացմանը, քանի որ բացակայում է օրենքը կյանքի կոչելու համար անհրաժեշտ, մասնագիտորեն հիմնավորված նորմատիվա-իրավական հիմքը, մասնավորապես` շրջակա միջավայրին հասցվող վնասի տնտեսական գնահատման կարգը, բացակայում է փորձաքննությունն իրականացնող պետական լիազոր մարմնի և փորձագետների համապատասխան իրավական պատասխանատվությունը սահմանող նորմերը:
Հաշվի առնելով «Շրջակա միջավայրի վրա ազդեցության փորձաքննության մասին» ՀՀ օրենքի կարևորությունը`ներքոստորագրյալները դատապարտում են գործադրի նման ոչ թափանցիկ գործելաոճը, պահանջում են ՀՀ Ազգային ժողովի սույն թվականի նոյեմբերի 28-ին հրավիրված արտահերթ նիստի օրակարգից հանել սույն նախագիծը և ապահովել հասարակության պատշաճ մասնակցությունը: