Երեկ ՀԱԿ հանրահավաքի ժամանակ ՀՀ առաջին նախագահ Լևոն Տեր-Պետրոսյանի ելույթը պետք է այսպես հասկանալ. «Ինչ ասում եմ՝ հակառակը հասկացեք»: «Առաջին լրատվական»-ի հետ զրույցում նման տեսակետ հայտնեց քաղտեխնոլոգ Կարեն Քոչարյանը`խոսելով երեկ հանրահավաքի ընթացքում ՀԱԿ առաջնորդի առաջարկության շուրջ:
Կարեն Քոչարյանը չի հավատում ՀՀ առաջին նախագահ-ԲՀԿ ղեկավար համագործակցությանը: «Ես չեմ հավատում Լևոն Տեր-Պետրոսյան և Գագիկ Ծառուկյան համագործակցությանը: Խնդիրն այն չէր, որ Լևոն Տեր-Պետրոսյանն առաջարկեց համագործակցել, այդտեղ ուրիշ խնդիր կար: Մինչև դա Լևոն Տեր-Պետրոսյանն ուրիշ բան էր ասում»,-մեկնաբանեց Կ. Քոչարյանը` հավելելով, որ նախկինում ասում էր, որ ընդհանուր ցուցակով գնալու դեպքում դիրք կկորցնի:
Քաղտեխնոլոգը այն կարծիքին է, որ սա քաղաքական խաղ է: Ամփոփելով՝ նա ասաց, որ ՀԱԿ առաջնորդի բոլոր ասածները պետք է հակառակ իմաստով հասկանալ:
Նշենք, որ երեկ ՀԱԿ հանրահավաքի ընթացքում ՀՀ առաջին նախագահը նշել է, որ եթե շարունակվեն իշխանական կոալիցիայի ներսում ծագած տարաձայնությունները և պարզվի, որ «Բարգավաճ Հայաստանն» անկեղծորեն մտադիր է դուրս գալ կոալիցիայից և պայքարել իրապես արդար ու օրինական ընտրություններ անցկացնելու համար, ապա Հայ ազգային կոնգրեսն այդ պարագայում պետք է պատրաստ լինի լրջորեն քննարկել ԲՀԿ հետ համագործակցելու հնարավորություններն ու հեռանկարները: