Վերահսկիչ պալատի կողմից «Մեկ ազգ մեկ մշակույթ» հիմնադրամում կատարած ստուգումների արդյունքներից պարզվել է, որ նախկինում ՕԵԿ, ներկայումս ԲՀԿ-ական Թամար Պողոսյանի ղեկավարած տարիներին այնտեղ ֆինանսական չարաշահումներ են կատարվել: «Առաջին լրատվական»-ն այս մասին տեղեկացավ Վերահսկիչ պալատի պաշտոնական կայքէջից:
Ըստ այդմ՝ Վերահսկիչ պալատն իր ուսումնասիրությունն ավարտել է 13 կետանոց եզրակացությամբ: Այդ կետերից մեկի համաձայն՝ հիմնադրամի 2008, 2009, 2010 թվականների հաշվետվություններով ներկայացված բյուջետային միջոցներից կատարված ծախսերը չեն համապատասխանել փաստացի ծախսերին` դրամարկղային ծախսը ցույց է տրվել որպես փաստացի ծախս, իսկ տարեսկզբի մնացորդները ծախսվել են գործադիր տնօրենի հայեցողությամբ հիմնադրամի կարիքների համար:
Մշակույթի նախարարությունը հիմնադրամի ապարատի պահպանման ծախսերը 2009 թվականին (ոչ փառատոնային տարի) նախատեսել է 2008 թ. փառատոնային տարվա համեմատ ավելի շատ (2008-ին նախատեսվել է 12,834.0 հազար դրամ, 2009-ին` 18,606.3 հազար դրամ), ինչպես նաև չի վերանայվել հաստիքային միավորների թիվը: Կամ՝ 2008 թ. «Գիտաճանաչողական ուղևորություններ» և «20 տարի անց» միջոցառումների նախահաշիվներով հիմնադրամի աշխատողներին նախատեսվել է աշխատավարձ և պարտադիր սոցիալական ապահովագրության վճար 3,000.0 հազ. դրամ, այն դեպքում, երբ 2008 թ. ապարատի պահպանման ծախսերով (12,834.0 հազար դրամ) արդեն իսկ նախատեսվել է 10,903.7 հազար դրամի աշխատավարձ և պարտադիր սոցիալական ապահովագրության վճար:
Երեք միջոցառումների նախահաշիվներով փառատոնի ստեղծագործական խմբի և հիմնադրամի աշխատողների համար նախատեսված աշխատավարձի գումարներից հաշվարկվել և վճարվել է հավելավճար 6,768.5 հազար դրամ (ներառյալ պարտադիր սոցիալական ապահովագրության վճարը):
Հիմնադրամի կողմից, առանց նվիրատուի գրավոր համաձայնության, 2008, 2009 թվականների նախահաշիվներով չնախատեսված 2,463.7 հազար դրամի ծախսեր են կատարվել, այդ թվում՝ ձեռք են բերվել 1,603.7 հազար դրամի հիմնական միջոցներ:
2010 թ. «Կատարողական արվեստի օրեր» ծրագրի միջոցներից հիմնադրամի աշխատակիցներին հաշվարկվել և վճարվել է ընդամենը 2,299.8 հազար դրամ հավելավճար (ներառյալ պարտադիր սոցիալական ապահովագրության վճարը) ու պաշտոնական պարտականություններից բացի` կատարած ավելացված աշխատանքի ծավալի դիմաց աշխատավարձին ավելացվել է ընդամենը 2,502.2 հազար դրամ (ներառյալ պարտադիր սոցիալական ապահովագրության վճարը), այն դեպքում, երբ ծրագրի միջոցառումների կազմակերպման և անցկացման նպատակով հիմնադրամի աշխատակիցներին պայմանագրի հավելված 1-ով (2010 թ. «Մեկ ազգ, մեկ մշակույթ» հիմնադրամի պահպանման ծախսեր) արդեն իսկ նախատեսված է եղել աշխատավարձ:
Թեմայի շուրջ պարզաբանումներ ստանալու համար փորձեցինք զանգահարել նաև Թամար Պողոսյանին, սակայն մեր զանգերն անպատասխան մնացին: