Թեյ խմել սիրում են բոլորը, իսկ պատրաստել` ոչ բոլորը, և այդ «դժվարին» գործը հեշտացնում են փոքրիկ ծրարիկներով թեյերը: Շատերը գիտեն, որ թեյը ապահովում է կենսունակությունը, կարգավորում մարսողությունը, ունի մանրէազերծ հատկություն:
Հայերը, մասնավորապես` կանայք, միշտ էլ աչքի են ընկել իրենց հնարամտությամբ, խնայելու բացառիկ տաղանդով, դա բացատրվում է նրանով, որ հայ կինը ստիպված է եղել ամեն ինչին խնայողաբար մոտենալ, այսօր էլ կա այդ միտումը, որի վառ ապացույցներից մեկն էլ մեկամգամյա օգտագործվող թեյի ծրարիկներն են, որոնք օգտագործվում են այնքան ժամանակ, քանի դեռ ի վիճակի են գունավորելու եռացրած ջուրը: Շատ հաճախ էլ հանդիպում են այնպիսի խնայող կանայք, ովքեր թեյի ոչ թե մեկ, այլ մի քանի ծրարիկների «փունջ» են պահում և թեյ մատուցելիս դրանով պատրաստում` չպատկերացնելով անգամ, որ դա շատ վնասակար կարող է լինել: Բժիշկները խորհուրդ են տալիս թեյի ծրարներն օգտագործել մեկ անգամ և դեն նետել, քանի որ այն կարող է մեկ անգամից հետո թունավոր նյութեր արտադրել և օրգանիզմին վնաս հասցնել: Բայց այդ ամենին ականջալուր չլինելով` հայ կանայք շարունակում են օգտագործել և թեյի հրավիրել իրենց ընկերուհիներին: Այս ամենով չի ավարտվում հայ կանանց հնարամտությունը, նրանք ուժասպառ ծրարիկներն օգտագործում են նաև որպես ներկանյութ, բույսերի համար պարարտանյութ և ամենակարևորը` աչքերի հիվանդության ժամանակ լավագույն բուժող միջոց:
