Մենք պայքարելու ենք օգոստոսից անազատության մեջ պահվող քաղբանտարկյալ Տիգրան Առաքելյանի ազատության համար: Այսօր կայացած ՀԱԿ հանրահավաքի ժամանակ այս մասին հայտարարեց Նիկոլ Փաշինյանը:
«Մեր ընկերները մեկ պայքար ունեն՝ և այդ պայքարը հանուն ազատության է»,- նկատեց նա:
ՀԱԿ համակարգող Լևոն Զուրաբյանն իր հերթին նկատեց, որ համաժողովրդական ճնշման ալիքը պետք է ստիպի հեռանալ Սերժ Սարգսյանին: «Առաջարկում ենք ընդունել Սերժ Սարգսյանի պաշոնանակության իրավաքաղաքական հռչակագիր: Առկա են նրա պաշտոնանկության հետևյալ հիմքերը. վարչապետի պաշտոնում Ս.Սարգսյանը դիմել է ընտրակեղծիքների և այդ ճանապարհով կատարել իշխանության յուրացում:
Մասնավորապես նա խախտել է օրենքի պահանջը. լինելով վարչապետ՝ միաժամանակ չարաշահել է պաշտոնական դիրքը՝ լինելով նաև նախագահի թեկնածու: Նա, որպես վարչապետ, աջակցել է Մարտի 1-ին, նպաստել է բռնի ուժի կիրառմանը, ինչի արդյունքում եղել են 10 զոհեր: Սերժ Սարգսյանը պարտակել է մարտիմեկյան դեպքերը:
ՀՀ ԶՈՒ գլխավոր հրամանատարի պաշտոնում ցուցաբերել է հանցավոր անգործություն, ինչի արդյունքում զոհվել են հարյուրավոր զինվորներ, անկում է ապրել բանակի բարոյահոգեբանական վիճակը: Երկիրը մղվել է քայքայման սահմանագիծ:
Սերժ Սարգսյանը պետք է անհապաղ հեռանա իշխանությունից»,- ասաց Զուրաբյանը՝ տեղում քվեարկության դնելով հռչակագիրը և ցուցարարների շրջանում բարձրացված ձեռքերի թվով այն համարեց ընդունված:
«Եկել է պահը վերականգնելու սեփական իշխանություն ընտրելու իրավունքը»,- ասաց ՀԱԿ համակարգողը:
