ՀԱԿ հանրահավաքի ընթացքում գրող, հրապարակախոս Տիգրան Պասկևիչյանը կոչ արեց չսպասել քաղաքական առաջնորդների որոշումներին, և դիմել վճռական գործողությունների։
«Մենք պետք է ստիպենք մեր առաջնորդներին, գնալ հեղափոխության։ Դրա համար այստեղ հավաքված 10 հազարը պետք է դառնա 100 հազար։ Եվ պետք չէ տրտնջալ, թե. ճանապարհները փակում են։ Ներեցեք, իսկ ո՞ր ապստամբի առաջ են բռնակալները ճանապարհ բացել ու գորգ փռել», – ասաց Պասկևիչյանը։
Նա հիշեց 8 տարի առաջ նոյեմբերին Վրաստանում տեղի ունեցած Վարդերի հեղափոխությունը։
«Վարդերի հեղափոխության՝ դրսի ուժերի կողմից կազմակերպված լինելու լուրերը հօդս են ցնդում, երբ հիշում ես նախահեղափոխական Վրաստանում տիրող կոռուպցիայի եւ ամենաթողության վիճակը, ճիշտ այնպես, ինչպես այսօր Հայաստանում է։
Ըստ Տիգրան Պասկեւիչյանի, վրացական հեղափոխությունը մերկացրեց նաև առասպելը, թե. «ով էլ գա, ոչինչ չի փոխվելու»։ Վարդերի հեղափոխությունն ապացուցեց, որ երկրում փոփոխություններ կարող են տեղի ունենալ միայն քաղաքական կամքի առկայության դեպքում։