Այն տեղեկությունները, որ այսօր շարունակվելու են բախումները ռուս ազգայնական խմբավորումների և կովկասցիների միջև, փաստորեն, համապատասխանում էին իրականությանը:
Այս պահին հայտնի է, որ ձերբակալվել է ավելի քան 1000 մարդ, որոնք մասնակցել են բախումներին կամ կասկածելի են թվացել իրավապահների համար:
Առաջին բախումները սկսվել են Մոսկվայի «Կիևյան» երկաթուղային կայարանի մոտ: Այստեղ տեղի է ունեցել մի քանի բախում, որի արդյունքում արդեն ժամը 18:00-ի դրությամբ ձերբակալվել էր 150 մարդ:
Ռուսական լրատվամիջոցները հայտնում են, որ բախումներ են տեղի ունեցել նաև Մոսկվայի այլ համայնքներում` «Ունիվերսիտետ», «Պրաժսկայա», «Նովոկուզնեցկայա» մետրոներում: Ընդհանուր խոսվում է մոտ 10 օջախների մասին: Մետրոյի կայարաններից մեկում, ըստ RBK կայքի, խոսվում է մեկ սպանվածի մասին: Ըստ կայքի` դա տեղի է ունեցել «Ունիվերսիտետ» մետրոյի կայարանում:
Անհանգիստ է այսօր եղել Ռուսաստանի երկրորդ մայրաքաղաք Սանկտ-Պետերբուրգում: Այնտեղ բերման է ենթարկվել մոտ 80 մարդ: Ըստ ականատեսների` դրանք մեծամասնությամբ կովկասյան ծագում ունեցող երիտասարդներ են: Նույն աղբյուրները հայտնում են, որ անհասկանալի է, թե ինչու էին ձերբակալում երիտասարդներին, քանի որ նրանք իրենց հանգիստ էին պահում և ոչ մի անօրինական բան չէին կատարել:
Սամարայում բերման է ենթարկվել մոտ 100 մարդ, որոնք փորձել են կռիվ հրահրել էթնիկական հողի վրա: Նրանք իրենց անվանել են տեղի «Կռիլյա Սովետով» թիմի երկրպագուներ:
Չնայած այս ամենին` ոստիկանությունը հայտնում է, որ ամեն ինչ վերահսկողության տակ է, և մասնավորապես Մոսկվայում հանգիստ է: Սա հավանաբար արվում է երկրում խուճապ չառաջացնելու համար: Երկրի ղեկավարությունից միայն վարչապետ Պուտինն է հայտարարել, որ տեղյակ է, թե ինչ է կատարվում երկրում, սակայն մեկնաբանություններ չի տվել:
«Առաջին լրատվականը» հետևում է զարգացումներին և նոր տեղեկություններ հայտնվելուն պես Ձեզ կտեղեկացնի դրանց մասին:
