Այսօր հանրապետության գլխավոր մարքսիստ Դավիթ Հակոբյանը լրագրողների հետ հանդիպմանը հայտարարեց, որ երեք ամիս շարունակ հանրապետության ուսուցիչների աշխատավարձերը բռնագանձվում են տնօրենների կողմից: Անդրադառնալով թիվ 127 դպրոցին՝ մարքսիստը ասաց, որ տնօրենն աշակերտներին ստիպում է քացով հարվածել ընդդիմացող ուսուցչուհուն, տնօրենը ուսուցիչների հետ բարոյահոգեբանական հաշվեհարդար է տեսնում: Նա նաև նշեց, որ բռնագանձումները հաճախ հասնում են երեսուն տոկոսի, բայց ԿԳՆ-ի կողմից ոչ մի արձագանք չկա: Նա հայտարարեց, որ նրանք, ովքեր հրաժարվում են աշխատավարձից թողնել տնօրենին, հրապարակավ ֆիզիկական հաշվեհարդարի են ենթարկում հենց միջանցքներում:
Թիվ 127 ավագ դպրոցի տնօրեն Նելսիկ Էլոյանից փորձեցինք պարզել` ի՞նչ է իրականում կատարվում իրենց դպրոցում: Պարզվում է` Դավիթ Հակոբյանն անցյալ տարի Նելսիկ Էլոյանի մոտ ընկերոջ հետ գնացել է դպրոց և խնդրել իր բարեկամուհուն` Լարիսա Պապյանին, ընդունել աշխատանքի` որպես ռուսաց լեզվի ուսուցչուհի: Տնօրենը ընդունել է, որից հետո Լարիսա Պապյանը ցանկացել է տնօրենի հետ այլ հարաբերությունների մեջ մտնել, սակայն մերժվելով` սկսել է բամբասանքներ տարածել: Բացի այդ, տնօրենի պատմելով` աշակերտների և գործընկերների հետ ուսուցչուհին անընդհատ վեճերի մեջ է եղել. «Ընդհուպ բանը հասել է նրան, որ 16 տարեկան մի աղջկա ապտակել է մարդկանց ներկայությամբ, որից հետո ծնողը իր երեխային հանել է դպրոցից»,- ասաց տնօրենը` հավելելով, որ նախորդ հինգշաբթի 16 տարեկան տղային դասարանի առաջ փողոցային լեզվով անվանել էր անբարոյականի տղա, որից հետո աշակերտը փորձել է հարվածել ուսուցչուհուն, սակայն ընկերները չեն թողել, հետ են քաշել, աշակերտը ընկել է, ոտքը կպել է ուսուցչուհու ոտքին։ Իսկ մարքսիստի պատմածը Նելսիկ Էլոյանը կատարյալ սուտ համարեց:
Տնօրենը, սակայն, այսօր մարքսիստի բարեկամի հետ զրույցում պարզել է, որ Լարիսա Պապյանը ոչ թե վերջինս բարեկամուհին է, այլ սիրուհին:
Լարիսա Գուրգենի Պապյանը դպրոցում աշխատում է մեկ տարի և երեք ամիս, իսկ այսօր չի եկել աշխատանքի:
«16 տարեկան աշակերտները բողոքել են մանկխորհրդին, և մանկխորհուրդը որոշում կկայացնի»,- ասաց տնօրենը:
Անդրադառնալով մարքսիստի հնչեցրած այն հայտարարությանը, որ մոտավորապես 30 տոկոսի չափով բռնագանձվում են ուսուցիչների աշխատավարձերը, Նելսիկ Էլոյանը պատասխանեց. «Բոլոր ավագ դպրոցներին չի բավարարում բյուջետային հատկացումը, դրա համար մենք, լինելով ՊՈԱԿ-ներ (ՊՈԱԿ-ի մասին օրենքի 3-րդ հոդված առաջին կետով), պատասխանատու ենք աշխատավարձերի հավելավճարների և այլնի համար: Մենք պետք է տարին փակենք առանց պարտքերի, ՊՈԱԿ-ի մասին օրենքը դա է ասում եղած հնարավորությունների սահմանում: Դրա համար մեզ մոտ հաշվեցինք բյուջեի ճեղքվածքը, այն կազմեց մոտ 5 մլն դրամ, և 27 տոկոս պակասեցնելով՝ մենք տեղավորվեցիք»,- ասաց տնօրենը` ավելացնելով, որ սա վերաբերում է հանրապետության բացառապես բոլոր ավագ դպրոցներին: Նա նաև ավելացրեց, որ հարցին լուծում կա. այս տարի ինչ պակասել է, մյուս տարի կկոմպենսացվի: