Հեռուստատեսության և ռադիոյի ազգային հանձնաժողովը դեկտեմբերի 16-ին կհրապարակի հեռուստահաճախությունների մրցույթների արդյունքները: 2002թ. ապրիլի 2-ից մինչ օրս եթերազրկված «Ա1+» հեռուստաընկերությունը այս անգամ ևս մասնակցում է ՀՌԱՀ հայտարարած մրցույթին և տվյալ հաճախականության վրա ունի մրցակից: «Ա1+» -ին եթեր վերադարձնելու համար ստեղծված «Ժողովրդական հեռուստատեսություն» հիմնադրամի հանգանակություն-քվեարկությունը շարունակվում է: Երևանի մամուլի ակումբի նախագահ, «Ժողովրդական հեռուստատեսություն» հիմնադրամի հոգաբարձուների խորհրդի անդամ Բորիս Նավասարդյանից «Առաջին լրատվականը» հետաքրքրվեց, թե այս անգամ ՀՀ իշխանությունները ողջամտություն կցուցաբերեն և չե՞ն խոչընդոտի «Ա1+»-ի` եթեր վերադառնալուն: «Կա մտավախություն, որ այս անգամ էլ «Ա1+»-ին եթեր չեն տրամադրի: Այստեղ կարող է լինել երկու միտում, որը կթելադրի իշխանություններին` որոշում կայացնելու հարցում: Առաջին դեպքում նրանք կարող են լսել ինչպես Հայաստանի հասարակության, այնպես էլ միջազգային հանրության ձայնը և վերականգնել «Ա1+»-ի խախտված իրավունքները: Երկրորդ միտումն այն կլինի, որ նախկինի պես կսահմանափակեն բազմազանությունը եթերում և սահմանափակել անկախ հեռուստաալիքների եթեր դուրս գալու հնարավորությունը : Թե որ միտումը կհաղթի` դժվարանում եմ ասել»,- ասաց մեր զրուցակիցը: Բորիս Նավասարդյանին հիշեցրինք, որ կա եվրոպական կառույցների ճնշումը, և հենց թեկուզ երկու տարի առաջ Մարդու իրավունքների եվրոպական դատարանը կայացրեց վճիռ` հօգուտ «Ա1+»-ի խախտված իրավունքների վերականգնման: Չի՞ կարծում, որ այն կարող է իր ազդեցությունն ունենալ: «Ես կարծում եմ, որ եթե որոշ կառույցներ կասկածներ ունեին «Ա1+»-ի իրավունքների սահմանափակումների հետ կապված, ապա վերջին զարգացումները` սկսած 2008 թ. մրցույթների սառեցումից մինչև այս տարվա հունիսին «Հեռուստատեսության և ռադիոյի մասին» ՀՀ օրենքում փոփոխություններ կատարելը, թվայնացման այդ ողջ գործընթացը ապացուցեցին, որ դա միտումնավոր քաղաքականություն է, որի նպատակը Հայաստանի եթերում բազմազանությունը բացառելն է: Այդ առումով միջազգային կառույցներն այսօր շատ ավելի հստակ և սկզբունքային դիրքորոշում ունեն»,- ասաց Բորիս Նավասարդյանը: