Քաղաքական վերլուծաբան Անուշ Սեդրակյանից «Առաջին լրատվականը» հետաքրքրվեց, թե որքանով է հնարավոր «Ա1+»-ի եթեր վերադարձը, եթե նկատի ունենանք, որ ՀՀ իշխանությունները շարունակում են խուսափել խոսքի ազատությունից և եթերային բազմազանությունից: «Վերջին շրջանում կազմակերպված ժողովրդական, հասարակական ակցիաները դրական վերջաբան են ունենում: Եվ ես չեմ կարծում, որ այդ շարժումներից վերևներում վախենում են: Հասարակական շարժումներին դրական հանգուցալուծում տալը վերևներում վախի զգացում չի առաջանում: Նրանք վախենում են գերտերություններից, տնտեսական բաց հարաբերություններից, բայց ոչ հասարակական շարժումներից: Այստեղ գոյություն ունի ուրիշ խնդիր: Ինձ թվում է, որ վերջապես ըմբռնում է առաջացել վերևներում, որ հասարակական գոլորշին պետք է բաց թողնել: Դա երևում է և՛ օրենսդրական խմբագրումներից, և՛ քրեաօլիգարխիկ-կլանային ապօրինությունների որոշակի սահմանափակումներից: Սակայն հղիների մասին օրենք խմբագրելը մի բան է, այլընտրանքային հեռուստաընկերություն ունենալն` այլ բան: Դուք հասկանո՞ւմ եք, որ եթե «Ա1+»-ը հեռարձակում ունենա, ապա կդառնա ամենադիտվող ալիքը և կստեղծի ֆինանսական մրցակցություն մյուս բոլոր ալիքների համար: Նա կստեղծի նաև այնպիսի քաղաքական բազա, որին, դժվար է ասել` կդիմանա՞ն մեր իշխանությունները, թե՞ ոչ: «Ա1+»-ն, այնուամենայնիվ, հեռուստաալիք է, իսկ հեռուստաալիքը Հայաստանում ամենավտանգավոր բանն է, որովհետև այն կարող է հասարակական կարծիքը կազմակերպել մասսայաբար: Ես կարծում եմ, որ որքան հնարավոր լինի ձգձգել «Ա1+»-ին եթեր չտրամադրելը, իշխանությունները կձգձգեն: Խնդիրն այն է, թե որտեղ կընդհատվի այդ սահմանը: