«Թիկնապահների մասին» օրենքի վերաբերյալ այսօր լրագրողների հետ հանդիպմանը խոսեցին օրենքի համահեղինակ, ԱԺ ՀՀԿ խմբակցության պատգամավոր Հովհաննես Սահակյանը և «Պահապան արծիվ» թիկնապահական դպրոցի տնօրեն Արսեն Դավթյանը:
Սահակյանը նշեց, որ թիկնապահների հարցը հասարակական հնչեղություն է ստացել, և ՀՀԿ 20-ամյակի ժամանակ Սերժ Սարգսյանը նույնպես բարձրացրել է այդ ոլորտը կարգավորելու հարցը:
Սահակյանը նշեց, որ օրենքի նախագծով իրենք փորձել են տալ դաշտի ընդհանուր օրենսդրական կիրառումը` սկսած զենք ձեռք բերելուց, կրելուց և այն օգտագործելուց:
Նա տեղեկացրեց, որ թիկնապահները կարող են կրել ծառայողական զենք` «Զենքի մասին» օրենքին համապատասխան, սակայն, նրա խոսքերով, թիկնապահի կողմից զենքի կիրառումը սահմանափակվել է, որպեսզի ցանկացած դեպքի համար թիկնապահը զենք չկիրառի:
Նրա խոսքերով` թիկնապահների պատրաստման լիցենզիա պետք է տրվի այն կազմակերպություններին, որոնք պատրաստ են համապատասխան մասնագիտական գիտելիքներ հաղորդել թիկնապահ դառնալու ցանկություն ունեցող մարդկանց:
«Չի կարող թիկնապահների պատրաստմամբ զբաղվել այն կազմակերպությունը, որը թխվածքաբլիթ է ներկրում ու ձեռքի հետ նաև զբաղվում թիկնապահների պատրաստմամբ»,- նշեց ՀՀԿ-ական պատգամավորը:
Արսեն Դավթյանն էլ նշեց, որ իրենց դպրոցում ուսումը տևում է 10 ամիս, ինչպես նաև վերապատրաստվելու հնարավորություն է տրվում թիկնապահ աշխատած անձանց:
Նա նշեց, որ թիկնապահները պետք է օրենքի սահմաններում աշխատեն, և հավելեց` ինքը դեմ է, որ թիկնապահները զենք կրեն, քանզի զենք կրելը վտանգավոր է, դրա համար պետք է ունենալ համապատասխան գիտելիքներ:
Ըստ Դավթյանի` թիկնապահները պետք է օգտագործեն այնպիսի առարկաներ, որոնք վախ չառաջացնեն շրջապատի մեջ:
«Թիկնապահին պետք են գիտելիքներ, որպեսզի նրանք ճիշտ պահին օգտագործեն իրենց գիտելիքները: Գիտելիքն անհրաժեշտ է թիկնապահին, որպեսզի նրան «վերբովկայի» միջոցով չկարողանան կռվի մեջ ներգրավել»:
Դավթյանը նշեց, որ սպորտսմեն, «սիրուն, զդարովի, մեծ փորով» տղերքը չպիտի կանգնեն գործատուի կողքին` իբրև թե թիկնապահ: Ըստ նրա` «հաստ վզերով, սափրած գլուխներով ու շշմած աչքերով» թիկնապահ կոչվածները պրոֆեսիոնալ չեն, այն թիկնապահները, որոնց շների պես «ֆաս» են տալիս, ու որոնք օգտագործում են իրենց բռունցքները, նրանք թիկնապահ չեն` ճիշտ թիկնապահը պետք է լինի նիհար, ճարպիկ, խելացի ու ուշադիր:
Նա նշեց, որ վերջին տարիներին միտում կա հաստավիզ թիկնապահներից անցում կատարել իր նշած պրոֆեսիոնալ թիկնապահների, ինչը գովելի է:
