Ռուսական լրատվամիջոցները հաղորդում են, որ այս պահին Մոսկվայի Կիևյան կայարանում տեղի են ունեցել առաջին բախումները: Հայտնի է, որ հատուկ ջոկատայինները ձերբակալել են ավելի քան 150 մարդու: Ոստիկանությանը հաջողվել է կանխել մի քանի փոքր բախումներ, որոնք կարող էին վերածվել մեծ ծեծկռտուքի:
Հայտնի է նաև, որ այդ հրապարակում են գտնվում կովկասյան և սլավոնական ծագմամբ մոտ 300 երիտասարդներ:
Հրապարակը վերահսկվում է նաև ոստիկանների բազմաթիվ խմբերի կողմից (ոստիկանների թիվն այս պահին հասնում է 3000-ի):
Gazeta.ru-ն գրում է, որ մի ընդհարումը հրահրել է ազգայնական խմբի մի ներկայացուցիչ, որը, լեզվակռվի բռնվելով մի կովկասցու հետ, այնուհետև անցել է հարվածների:
Տեղեկություններ են եղել նաև, որ բախումներ են տեղի ունեցել նաև «Սմոլենսկայա» հրապարակում, որտեղ կովկասցիների մի խումբ ծեծի է ենթարկել մի խումբ ռուսների, որոնք, նախնական տվյալներով, եղել են ֆուտբոլային թիմի երկրպագուներ:
Հիշեցնենք, որ անցած շաբաթ օրը` դեկտեմբերի 11-ին, «Սպարտակ» ֆուտբոլային թիմի երկրպագուներից մեկի սպանությունից հետո, մի քանի հազար մարդ է հավաքվել Մոսկվայի կենտրոնում, նրանց են միացել առիթից օգտված ազգայնական կառույցների ներկայացուցիչները և անցել վայրագությունների, որի արդյունքում մի քանի տասնյակ` ոչ սլավոնական ծագում ունեցող մարդիկ ստացել են տարբեր աստիճանի մարմնական վնասվածքներ:
Այս օրերին ոստիկանությունը Մոսկվայում աշխատում է ծանրաբեռնված ռեժիմով, քանի որ կանխատեսվում է, որ դեպքերը կարող են կրկնվել: Բացի այդ, տեղեկություններ կան, որ Կովկասից դեպի Մոսկվա են շարժվում վրիժառու խմբեր` պատժելու ռուս ազգայնականներին վերջին օրերի վայրագությունների, հարձակումների համար: