«Ժողովուրդ» օրաթերթը տեղեկացնում է, որ այսօր Արարատի մարզի ընդհանուր իրավասության դատարանում (նստավայրը՝ Արտաշատ) սկսվելու է նախկին մարզպետ, ՀՀԿ-ական Վարդգես Հովակիմյանի դեմ հարուցված քրեական գործի դատաքննությունը:
Թերթը հիշեցնում է, որ նախկին մարզպետին մեղադրանք էր առաջադրվել պաշտոնական լիազորությունները գերազանցելու և չարաշահումների համար: Վարդգես Հովակիմյանը «Ժողովուրդ» թերթի հետ հեռախոսազրույցում ասել է, որ մինչև հիմա դատական նիստերը հետաձգվել են տարբեր պատճառաբանություններով, հիմնականում մեղադրող կողմի բացակայության պատճառով:
«Այս նիստին, կարծում եմ, կներկայացնեն մեղադրական եզրակացությունը, իսկ ես պնդելու եմ, որ ինձ մեղավոր չեմ ճանաչում»,-ասել է Հովակիմյանը թերթի հետ հարցազրույցում: