ՄԱԿ-ում Միացյալ Նահանգների մշտական ներկայացուցիչ Սյուզան Ռայսը նամակով դիմել է ՄԱԿ-ի գլխավոր քարտուղար Պան Գի Մունին` Սադամ Հուսեյնի ժամանակաշրջանում ընդունված պատժամիջոցները վերացնելու խնդրանքով: Դեռ հայտնի չէ` կպաշտպանե՞ն արդյոք մյուս երկրները ԱՄՆ այս որոշումը:
Այսօր ՄԱԿ-ում տեղի կունենան իրաքյան հարցով քննարկումներ: ԱՄՆ-ն, որ նախագահում է ՄԱԿ-ի անվտանգության խորհրդում, ցանկանում է բացել իրաքյան թեմայով նոր քննարկումներ:
Ամերիկացիների այս քայլն աննախադեպ է, քանի որ այս առաջարկը քննարկման է դրվել նիստից անմիջապես առաջ, ինչն ընդունված չէ ՄԱԿ-ի պրակտիկայում:
ԱՄՆ-առաջարկում է հանել «Նավթ պարենի դիմաց» ծրագրով և միջուկային էներգետիկայի զարգացման համար նախանշված սահմանափակումները:
Հիշեցնենք, որ ՄԱԿ-ը պատժամիջոցներ է կիրառում ընդդեմ Իրաքի այն պահից, երբ Իրաքը 1990թ. գրավեց հարևան Քուվեյթը և հայտարարեց նրա բռնակցման մասին: 1991թ. միջազգային կոալիցիայի «Փոթորիկ անապատում» ռազմական օպերացիայից հետո ընդդեմ Իրաքի, արաբական այդ երկիրը ենթարկվեց խիստ պատժամիջոցների, որոնք դեռևս չեն վերացվել:
