Հանրապետական կուսակցության փոխնախագահ, Ազգային ժողովում կուսակցության խմբակցության ղեկավար Գալուստ Սահակյանն «Ազատություն» ռադիոկայանի հետ զրույցում չի բացառում, որ մինչև գալիք խորհրդարանական ընտրությունները Ազգային ժողովի նոր նախագահ չընտրվի:
Գ. Սահակյանը նաև ասել է, որ ՀՀԿ-ի ղեկավար անդամների` այսօր երեկոյան կայանալիք հանդիպմանը ԱԺ նախագահի թեկնածուի հարց չի քննարկվելու:
Հիշեցնենք, որ երկուշաբթի օրը ԱԺ-ի արդեն նախկին նախագահ Հովիկ Աբրահամյանը վերահաստատել է հրաժարականի իր դիմումը, և խոսնակի պարտականությունները այժմ կատարում է ԱԺ-ի փոխնախագահ, ՀՀԿ-ի ներկայացուցիչ Սամվել Նիկոյանը:
Գ. Սահակյանը չի բացառել, որ մինչև 4-րդ գումարման ԱԺ-ի աշխատանքների ավարտը, այսինքն` մինչև առաջիկա խորհրդարանական ընտրությունները, իրավիճակն այդպես էլ պահպանվի, Ս. Նիկոյանը շարունակի կատարել խոսնակի պարտականությունները:
«Նույնիսկ եթե այդպես պահպանվի, կարծում եմ, ԱԺ-ն կաշխատի նույն ընթացակարգերով, նույն սկզբունքներով, նույն մոտեցումներով: Առավել ևս` այդ կարճ ժամանակաշրջանում նոր մոդելավորում կամ նոր պրոցեսներ սկսելը հնարավոր չէ… Համենայն դեպս, «Ազգային ժողովի կանոնակարգ» օրենքը հնարավորություն է տալիս, որ այսպես աշխատենք: Այդ պատճառով է, որ չեմ կարծում, որ մեզ համար սկզբունքային է:
Մի քանի ամիս է մնացել, այդ ամիսների ընթացքում էլ` մի քանի նիստեր: Կարծում եմ, այդ նույն մոտեցումներով մեզ համար հաղթահարելի է մինչև վերջ ԱԺ-ն տանել այն ուղղվածությամբ, որը մինչեւ այսօր եղել է»,- ասել է Գ. Սահակյանը:
Նա փոխանցել է նաև, որ, ըստ ամենայնի, երկուշաբթի օրը կառավարության առաջարկով ԱԺ-ի արտահերթ նիստ կանցկացվի, որտեղ խորհրդարանական մեծամասնությունը չի պատրաստվում սեփական նախաձեռնությամբ ընդգրկել նաև Ազգային ժողովի նախագահի ընտրության հարց:
Եթե, այնուամենայնիվ, առաջիկայում որոշեն խորհրդարանի նոր նախագահ ընտրել, ապա, ըստ Սահակյանի, ՀՀԿ-ի թեկնածուն Սամվել Նիկոյանն է լինելու:
«Ես կարծում եմ, ճիշտը հենց դա էլ կլինի: Փոխխոսնակ է, բավականին փորձառություն ունի, և կարծում եմ, խմբակցությունը և ԱԺ-ն աջակից կլինի»,- նշել է նա:
