Օրերս անդրադարձել էինք ՀՀ երկրորդ նախագահ Ռոբերտ Քոչարյանի ֆեյսբուքյան խմբին: Խմբի անդամներից շատերը, համենայնդեպս նրանք, ում հետ հնարավոր եղավ կապ հաստատել, պնդում էին, որ անակնկալի են եկել իրենց Ռոբերտ Քոչարյանի ֆեյսբուքյան էջում հայտնաբերելով, և շտապում էին լքել խումբը: Մի քանի օրերի ընթացքում` խմբում պարտադրված անդամների թիվը 909 է երեկվա տվյալներով, սակայն պետք է նկատել, որ շատերը դեռ տեղյակ չեն, որ այդ խմբի անդամ են: Այն, որ շատ դանդաղ է ավելանում խմբի անդամների թիվը, ցույց է տալիս Ռոբերտ Քոչարյանի նկատմամբ ֆեյսբուքյան հասարակության ընդգծված վերաբերմունքը:
Հոդվածում նշել էինք, թե ակնհայտ է, որ էջի վրա աշխատող ադմինիստրացիան չի տիրապետում իրավիճակին, քանի որ այնպիսի մարդկանց են ներգրավել, որ հստակ Ռոբերտ Քոչարյանի նկատմամբ ունեն խիստ բացասական վերաբերմունք: Էլեոնորա Գևորգյանին (ադմին) նամակ էինք գրել: Հոդվածից մի քանի օր հետո, այնուամենայնիվ, էջի ադմին Էլեոնորա Գևորգյանը պատասխանեց մեր հարցին, թե ինչ սկզբունքով եք մարդկանց էջում ներգրավում, առհասարակ ի՞նչն եք հաշվի առնում:
Ըստ նրա. «Եթե խոսում եք էջի մասին, ապա պետք է իմանաք, որ այդ էջին հավանություն են տալիս, ինչի շնորհիվ էլ մարդիկ տեղեկանում են Քոչարյանի ոչ պաշտոնական կայքում տեղադրվող նոր հոդվածների մասին: Ինչ վերաբերում է խմբին, ապա ես ինքս ոչ մեկի չեմ ավելացնում, մարդիկ իրենց կամքով են ուզում այդ խմբի անդամ դառնալ, եթե ինչ-որ մեկն էլ ավելացնում է իր ընկերներին, վերջիններս չուզենալու դեպքում կարող են լքել խումբը…»:
