Թուրքիայում չեն բացառում, որ երկրորդ ատոմակայանն էլ Թուրքիայի տարածքում կկառուցեն ռուսական ընկերությունները: Այս մասին հայտնել է Ստամբուլում Թուրքիայի էներգետիկայի փոխնախարար Մեթին Քլըջին: հաղորդում է РИА-Новости գործակալւթյունը: «Ատոմակայանի կառուցման աշխատանքները գտնվում են նախնական փուլում: Մենք Ռուսաստանի հետ անցկացրել ենք հաջող աշխատանք առաջին ատոմակայանի կառուցման գործով: Ինչո՞ւ չաշխատել Ռուսաստանի հետ նաև երկրորդ ատոմակայանի կառուցման գործում»,- ասել է փոխնախարարը:
Հիշեցնենք, որ Ակկույու ատոմակայանի կառուցումն իրականացնելու է ռուսական կողմը: Ատոմակայանի առաջին ռեակտորը կկառուցվի մինչև 2018 թ., իսկ մնացած երեքը շահագործման կհանձնվեն հետագա երեք տարիների ընթացքում` ամեն տարի մեկ ռեակտոր հաշվարկով: Նախատեսվում է, որ 2021 թ. վերջնական շահագործման հանձնելուց հետո ատոմակայանը կծառայի մոտ 60 տարի: