Դեկտեմբերի 15-ին ՀՀ Ազգային ժողովի նախագահ Հովիկ Աբրահամյանն ընդունեց արգենտինացի դիվանագետ, դոկտոր Լեանդրո Դեսպուիին, որը Երևանում մասնակցում է «Ցեղասպանության հանցագործությունը. կանխարգելում, դատապարտում և հետևանքների վերացում» խորագրով միջազգային գիտաժողովին, որը նվիրված է ցեղասպանության հանցագործությունը կանխարգելելու և պատժելու մասին ՄԱԿ-ի կոնվենցիայի ընդունմանը: Հանդիպմանը ներկա էին ԱԺ աշխատակազմի ղեկավար Գեղամ Ղարիբջանյանը և ԱԺ ՀՅԴ խմբակցության ղեկավար Վահան Հովհաննիսյանը:
ԱԺ նախագահը բարձր գնահատեց Հայաստանի և Արգենտինայի միջև հարաբերությունները և հայ-արգենտինական բարեկամությունը, որի վառ օրինակն է պարոն Դեսպուիի գործունեությունը և Հայոց ցեղասպանության միջազգային ճանաչման գործում նշանակալի ավանդի համար ՀՀ նախագահ Սերժ Սարգսյանի կողմից նրան Մխիթար Գոշի մեդալով պարգևատրելը: Հովիկ Աբրահամյանը կարևորեց արգենտինացի հյուրի վաստակը մարդու իրավունքների պաշտպանության բնագավառում և նրա ներդրումը 2006 թվականի նոյեմբերի 29-ին Արգենտինայի խորհրդարանի կողմից Հայոց ցեղասպանության ճանաչման մեջ. Արգենտինան Ուրուգվայից հետո հարավամերիկյան մայրցամաքում երկրորդ երկիրն է, որը 20-րդ դարասկզբի իրադարձությունները որակել է Ցեղասպանություն: Խորհրդարանի նախագահն ասաց, որ նման գործիչների այցերը կնպաստեն երկու երկրների միջև հարաբերությունների ակտիվացմանը: ԱԺ նախագահը նշեց, որ հաջորդ տարվա գարնանը նախատեսված է իր պաշտոնական այցը Արգենտինա:
Դոկտոր Լեանդրո Դեսպուին շնորհակալություն հայտնեց ջերմ ընդունելության համար: Նրա խոսքերով` Հայոց ցեղասպանության ճանաչումն ավելի է մոտեցրել հայ և արգենտինացի ժողովուրդներին, հայ համայնքը հարգված է Արգենտինայում, իսկ Հայաստանի խորհրդարանի ղեկավարի այցը հարավամերիկյան այդ երկիր լուրջ խթան կլինի երկկողմ հարաբերությունների զարգացման համար:
ԱԺ նախագահ Հովիկ Աբրահամյանը կարևոր համարեց համագործակցությունը խորհրդարանների միջև և պատվիրակությունների փոխայցելությունները, որոնք հնարավորություն կտան սերտացնել կապերը երկու երկրների միջև: Նա նաև երախտագիտություն հայտնեց Արգենտինայի իշխանությունների կողմից մեր հայրենակիցների նկատմամբ ցուցաբերվող ջերմ վերաբերմունքի համար:
Լեանդրո Դեսպուիի համոզմամբ` Հայոց ցեղասպանությունն անժխտելի փաստ է, և նրա ճանաչումը ոչ միայն հայ ժողովրդի, այլև ողջ աշխարհի խնդիրն է:
Հովիկ Աբրահամյանը նշեց, որ Հայոց ցեղասպանության դատապարտումը հնարավորություն է` կանխելու նման հանցագործության իրականացումը այլ ժողովուրդների նկատմամբ:
Զրուցակիցներն անդրադարձան նաև ԼՂ հակամարտությանը, հատկապես կարևորվեց ազգերի ինքնորոշման իրավունքը`նշելով, որ հարցը պետք է լուծվի այդ, ինչպես նաև ուժի չկիրառման, տարածքային ամբողջականության սկզբունքների հիման վրա: