Ինչպես հաղորդում է «Ազատություն» ռադիոկայանի թղթակիցը, Լուսակերտի զորամասի անցագրային կետի մոտ օրերս տեղի ունեցած վիճաբանության, ծեծկռտուքի, այնուհետև` վրաերթի առնչությամբ առայժմ մեկ քաղաքացի է ձերբակալված, ևս մի քանիսը բերման են ենթարկվել:
Ձերբակալվածը Արսեն Արիստակեսյանն է, ով իր BMW մակնիշի ավտոմեքենայով նոյեմբերի 20-ին վրաերթի է ենթարկել այդ զորամասի ժամկետային զինծառայող Արմեն Սանթոյանին:
Վերջինս գտնվում է պաշտպանության նախարարության Կենտրոնական կլինիկական զինվորական հոսպիտալում: Ըստ նրա բուժող բժիշկ Գեղամ Ազիզյանի՝ զինվորը մարմնական վնասվածքներ և ուղեղի ցնցում է ստացել։ Նրա վիճակը գնահատվում է միջին ծանրության:
Պաշտպանության նախարարությունից ստացած նախնական տեղեկություններով` միջադեպը ծագել է զինվորների մազերը կտրելու պատճառով, երբ սերժանտ Արտակ Փիրուզյանը նորակոչիկներին հանձնարարել է, որ մազերը կտրելուց հետո յուրաքանչյուրը մաքրի հատակը: Նրանցից մեկը` նորակոչիկ Հունան Հարությունյանը, զանգահարել է եղբորը, պատմել հատակը մաքրելու մասին, որից հետո, ըստ պաշտոնական տեղեկատվության, նրա ավագ եղբայրը` Հայկ Հարությունյանը իր ընկերների հետ Porsche Cayenne և BMW մեքենաներով եկել է զորամաս, մոտեցել հսկիչ անցագրային կետին, փորձել ներխուժել զորամասի տարածք, բայց նրանց թույլ չեն տվել: Ծագել է վիճաբանություն զորամասի անձնակազմի և այդ երիտասարդների միջև, ինչը վերածվել է ծեծկռտուքի: 15 րոպե տևած ծեծկռտուքի մասնակիցների թիվը գնալով ավելացել է, ներգրավվել են նաև այլ զինվորականներ: Այնուհետև քաղաքացիական անձինք մեքենաներով փորձել են դիմել փախուստի` վրաերթի ենթարկելով զինվոր Արմեն Սանթոյանին:
Նորակոչիկ Հունան Հարությունյանը, ում պատճառով, պաշտոնական տեղեկությունների համաձայն, ծագել է միջադեպը, և ծեծկռտուքի մասնակից քաղաքացիական անձինք «Չորրորդ գյուղ» կոչվող Հաղթանակ համայնքի բնակիչներ են:
Հարությունյանների ծնողները ասել են, որ իրենց որդին դեպքից 5 օր առաջ է զորակոչվել բանակ, նրա մազերը կարճ կտրած են եղել, և, եթե նա զանգել է եղբորը, ուրեմն ավելի լուրջ պատճառ է եղել։
Նրանց հայրը՝ Հրանտ Հարությունյանը, ասել է, որ իր ունեցած միակ մեքենան խորհրդային տարիներին հաշմանդամության համար ստացած «Զապորոժեց»-ն է և նշված Porsche Cayenne-ը և BMW-ն հավանաբար որդու ընկերների մեքենաներն են եղել:
Մամուլում եղել են հրապարակումներ, որ միջադեպի անմիջական մասնակիցներ են եղել նաև Պետեկամուտների նախկին նախարար, ներկայումս ընդդմադիր Սմբատ Այվազյանի մերձավորները, սակայն Այվազյանը ռադիոկայանի հետ զրույցում հերքել է այս լուրերը՝ ասելով, որ ինքն էլ է Չորրորդ գյուղից և ուղղակի գնացել է հիվանդանոց՝ դեպքի ժամանակ դաժան ծեծի ենթարկված իր համագյուղացի Հարություն Թորոսյանին տեսակցության։
«Ես զարհուրելի տեսարան տեսա, անճանաչելիորեն փոխված երիտասարդ, դաժան ծեծի արդյունքում ամբողջովին փոխվել էր նրա արտաքին տեսքը: Զինվորականների կողմից է ծեծի ենթարկվել»,- ասել է Սմբատ Այվազյանը: