«Առաջին լրատվական»-ի զրուցակիցն է Թբիլիսիի հայերի ասամբլեայի ղեկավար Առնոլդ Ստեփանյանը:
– Վրաստանի նախագահի մամլո քարտուղար Մանանա Մանջգալաձեն երեկ հայտարարել է, որ Սերժ Սարգսյանը Վրաստան կայցելի նոյեմբերի 29-30-ը… Այն խառնաշփոթից հետո, որ առաջացել էր այս այցելության առիթով, Ձեր կարծիքով, այցը ի՞նչ նշանակություն կարող է ունենալ, և արդյոք այդքան քննարկված հանգամանքը, թե Սերժ Սարգսյանը նեղացել է Միխեիլ Սաակաշվիլիից, որևէ ազդեցություն կունենա՞:
– Կարծում եմ` այցն ինքնին կարևոր է այն ամենի ֆոնին, որ կատարվում էր մայիսին և հունիսին, երբ հակահայկական ակցիաների մի շարք դեպքեր գրանցվեցին Վրաստանում, և շատ ցավալի էր, որ դա իրականացվում էր Վրաստանի հասարակական մտքի առաջնորդների նախաձեռնությամբ: Այդ դեպքերը հաճախակիացան նաև կրոնական խմբավորումների մասին օրենքի ընդունումով: Եթե Սերժ Սարգսյանի այցն այս անգամ լինի առավել կազմակերպված, քան նախորդ անգամ, և եթե հայկական կողմը խորապես վերլուծած լինի այն իրադարձությունները, որոնք եղել են մինչ այս Վրաստանում, ապա, կարծում եմ, այցը կարող է վերջ դնել ոչ միայն հայ-վրացական հարաբերություններում առաջացած որոշակի բացասական դրսևորումներին, այլ նաև կանխել իրավիճակի հետագա վատթարացումը: Նախկինում հայկական կողմը այնքան էլ համարժեք պատասխան չէր տալիս այն հիստերիային, որն իրականացվում էր Վրաստանում հայերի նկատմամբ, սակայն վերջին ամիսներին նկատելի է, որ Վրաստանում հայկական դեսպանությունը բավականին ակտիվ ու համարժեք է աշխատել, և այդ ամենից ելնելով հույս ունեմ, որ Սերժ Սարգսյանի այցը դրական ազդեցություն կունենա հայ-վրացական հարաբերությունների հետագա ընթացքի վրա:
Կարծում եմ` այն խոսակցությունները, թե Սերժ Սարգսյանը նեղացել է Սաակաշվիլիից, այդքան էլ չի համապատասխանում իրականությանը, չնայած երկրի ղեկավարների հարաբերությունները որոշակիորեն անդրադառնում են երկրների միջև հարաբերությունների վրա: Կարծում եմ` Սերժ Սարգսյանը նոյեմբերի սկզբին չցանկացավ այցելել Վրաստան Ռուսաստան այցից անմիջապես հետո, ինչպես նաև նախագահների այցերից առաջ սովորաբար լինում են արտգործնախարարների այցեր, և այցելության հետաձգումը թերևս լավ պատրաստվելու ու այս գործընթացներն իրականացնելու հետ էր կապված:
– Պարոն Ստեփանյան, որո՞նք են այն առաջնահերթությունները, վրացահայությանը հուզող հիմնական խնդիրները, որոնք պետք է քննարկի Սերժ Սարգսյանը:
– Հիմնական հարցը, որ պետք է քննարկվի, կապված է Վրաստանում տիրող հակահայկական տրամադրությունների հետ: Նման տրամադրությունների առկայությունը մեծ վտանգ է միջպետական հարաբերությունների զարգացման համար: Կարծում եմ` Հայաստանի և Վրաստանի համար այդ վտանգը վերացնելը պետք է լինի առաջնային մարտահրավերներից մեկը: Մինչ այս այդ վտանգին արժանի ուշադրություն չի դարձվել, և եթե գոնե այսօր համապատասխան ուշադրություն և աշխատանք լինի այդ ուղղությամբ, ապա կարծում եմ, հնարավոր է անցավ լուծել առկա խնդիրները: Եթե ոչ, ապա հակահայկական տրամադրությունները Վրաստանում կարող են զարգանալ և հանգեցնել կոնֆլիկտի:
– Իսկ Վրաստանի հայկական համայնքը ինչ-որ հույսեր կապո՞ւմ է Սերժ Սարգսյանի այցի հետ, թե՞ ոգևորությունն այդքան էլ մեծ չէ:
– Չէի ասի, որ ակտիվ քննարկում է ընթանում համայնքում այդ այցի առնչությամբ: Կարծում եմ` պատճառներից մեկն այն է, որ նման այցելությունները նախկինում հայկական համայնքի կյանքի վրա որևէ կերպ չեն անդրադարձել, ու եթե ինչ-որ մեկը շահել է այդ այցերից, ապա դա եղել են միայն մի շարք կառույցներ, ասենք, հայկական թատրոնը կամ որոշ հայկական լրատվամիջոցներ: Ընդհանուր առմամբ կարելի է ասել, որ հայկական համայնքը, սովորության համաձայն, որևէ հույս չի կապում այդ այցի հետ: Սակայն համայնքի ղեկավարները և այն գործիչները, որոնք զբաղվում են վրացական համայնքի խնդիրներով, հույս ունեն, որ Սերժ Սարգսյանի այս այցը հնարավորություն կտա հայ-վրացական համագործակցությունը նոր դաշտ տեղափոխել և հաղթահարել այն վտանգները, որոնք այսօր առկա են:
