Այսօր ԱԺ «Ժառանգություն» խմբակցության ղեկավար Ստյոպա Սաֆարյանը ԵԱՀԿ երևանյան գրասենյակում հանդիպեց ԵԱՀԿ Ժողովրդավարական հաստատությունների և մարդու իրավունքների գրասենյակի (ԺՀՄԻԳ) Մարդու իրավունքների դեպարտամենտի մարդու իրավունքների գծով խորհրդական Օմեր Ֆիշերի հետ: Հանդիպման ընթացքում քննարկվեցին «Ժողովներ, հանրահավաքներ, երթեր և ցույցեր անցկացնելու մասին» ՀՀ գործող օրենքը, դրանում առկա թերությունները: Ս.Սաֆարյանը մանրամասն ներկայացրեց իրավակիրառման պրակտիկայում առկա խնդիրները: Ի թիվս այլոց, քննարկման առարկա դարձան քաղաքային իշխանությունների կողմից զանգվածային հրապարակային միջոցառումների անցկացումն արգելող որոշումները վարչական դատարանում օբեկտիվորեն չքննարկվելու վերաբերյալ «Ժառանգության» մտահոգությունները: Խմբակցության ղեկավարը ներկայացրեց, որ վարչական դատարանը գրեթե միշտ ուժի մեջ է թողնում տեղական ինքնակառավարման մարմինների՝ նույնիսկ ակնհայտ ապօրինի որոշումները: Բացի այդ, ներկայացվեց նաև, որ օրենքը կիրառելիս քաղաքապետարանները հրապարակային զանգվածային միջոցառումների մասին իրազեկումները դիտարկում են որպես թույլտվության հայցում և ոչ ի գիտության ընդունման առարկա, ինչպես դա ենթադրվում է «Ժողովներ, հանրահավաքներ, երթեր և ցույցեր անցկացնելու մասին» ՀՀ օրենքով:
Խորհրդական Ֆիշերը նշեց, որ տեղյակ է դեկտեմբերի 21-ին «Ժառանգություն» կուսակցության ավտոերթ անցկացնելու նախաձեռնությանը, և որ վերջինիս մասին իրազեկում է ներկայացվել Երևանի քաղաքապետարանին: Հանդիպման ընթացքում պարոն ֆիշերը տեղեկացրեց նաև, որ ԵԱՀԿ ԺՀՄԻԳ-ի փորձագետները իրականցնում են «Ժողովներ, հանրահավաքներ, երթեր և ցույցեր անցկացնելու մասին» ՀՀ օրենքի կրառման մոնիտորինգ: Ֆիշերը հույս հայտնեց, որ նշված մոնիտորինգի իրականացումը կարող է օգնող հանգամանք հանդիսանալ օրենքի օբյեկտիվ կիրառման տեսանկյունից:
