Եվրոպայում սկանդալ է հասունանւմ: Ողջ աշխարհը դեռ շարունակում է քննարկել WikiLeaks-ի հրապարակած փաստաթղթերը, հիմա էլ նոր սկանդալ է հասունանում Եվրոպայում` Կոսովոյի շուրջ:
Օրերս հայտնի է դարձել, որ Եվրոպայի խորհրդի իրավական հարցերով հանձնաժողովում հինգշաբթի օրը ներկայացվելու է շվեյցարացի Դիկ Մարտիի հատուկ զեկույցը, որը վերաբերում է Կոսովոյի իշխանությունների և այդ նորանկախ պետության շուրջ ստեղծված իրավիճակին:
Թեպետ զեկույցը դեռ չի հրապարակվել, սակայն արդեն հայտնի են մի շարք փաստեր, որոնք կարող են պայթյունի ազդեցություն ունենան եվրոպական քաղաքական շրջանակներում:
Ըստ այդ զեկույցի, որը Մարտին պատրաստել է վերջին 2 տարիների ընթացքում` հավաքելով փաստեր, հարցաքննելով բազմաթիվ վկաների, ինչպես նաև օգտագործելով եվրոպական երկրների և ՆԱՏՕ-ի հետախուզական տվյալները, Կոսովոյի ազատագրության բանակի բժշկական ծառայության ղեկավարը կոորդինացրել է մարդու օրգանների և թմրանյութերի վաճառքը: Ընդ որում, Կոսովոյի վերջին ընտրություններում հաղթած Հաշիմ Թաչին գլխավորել է մեծ ցանց, որն իրականացրել է թմրանյութերի, մարդու օրգանների վաճառք, ինչպես նաև պատվիրված սպանություններ:
Ինչպես գրում է The Times-ը, Հաշիմ Թաչին, Կոսովոյի ազատագրության բանակի ամենահզոր մաֆիոզն է: Հրապարակման մեջ նաև նշվում է, որ այս զեկույցը լուրջ սկանդալ կառաջացնի Եվրոպայում, քանի որ ԱՄՆ և դաշնակիցները ծանոթ են եղել այս իրողությանը, սակայն աչք են փակել սրա վրա այն պարզ պատճառով, որ անհրաժեշտ էր այդ պահին ունենալ հզոր լիդեր, որը կկանգներ նորանկախ պետության գլուխ: Մարտին զեկույցում նշում է, որ Հաշիմ Թաչին և նրա «գործընկերները» հիմա ազատության մեջ են, քանի որ շատ վկաներ արդեն սպանված են, կամ նրանց այնպես են վախեցրել, որ նրանք չեն ցանկանա խոսել:
Մարտին նշում է, որ Թաչիի ցանցով վաճառվել են սերբ գերիների օրգանները: Իսկ վերջերս Կոսովոյում դատական գործ է սկսվել մի խումբ բժիշկների դեմ, որոնք Medicus կենտրոնում զբաղվել են օրգանների անօրինական փոխպատվաստմամբ:
Այս տեղեկություններին միանգամից արձագանքել են Կոսովոյի իշխանությունները՝ անվանելով հերյուրանք:
ՌԴ արտգործնախարար Սերգեյ Լավրովն էլ կոչ է արել այս հարցը բարձրացնել որքան հնարավոր է՝ շատ տեղերում և լուրջ քննարկման առարկա դարձնել:
Սերբիայի արտաքին գործերի նախարարն էլ հայտարարել է, թե ինքը չի կարծում, որ այս զեկույցից հետո Կոսովոն այլևս ապագա ունի: