ՀԱԿ-ը նոյեմբերի 25-ի հանրահավաքում կներկայացնի ՀՀ նախագահ Սերժ Սարգսյանի պաշտոնանկության իրավաքաղաքական հիմքերի մասին հռչակագիր:
Այս մասին «Ազատություն» ռադիոկայանի հետ զրույցում ասել է Կոնգրեսի համակարգող Լևոն Զուրաբյանը` չցանկանալով մանրամասնել հռչակագրի բովանդակությունը:
«Բնականաբար, դա քաղաքական դեկլարացիա է լինելու, որին հրավիրելու ենք միանալ բոլոր քաղաքական ուժերին, բոլոր պատգամավորներին: Պատգամավորները կա’մ դա անելու են ժողովրդի ցանկություններին ընդառաջ, կա’մ ստիպված են լինելու զիջել իրենց տեղն այն մարդկանց, որոնք այդ հռչակագրի կողմնակիցն են լինելու»,- ասել է Զուրաբյանը:
Դիտարկմանը, թե այսօր ԱԺ-ում մեծամասնությունը (63 մանդատ) Ս. Սարգսյանի գլխավորած կուսակցության ներկայացուցիչներն են, ընդդիմադիր գործիչն արձագանքել է, թե 1988թ. էլ Հայկական Սովետական Սոցիալիստական Հանրապետության Գերագույն խորհրդի մեծամասնությունը կոմունիստներ էին, բայց դա չէր խանգարում այն ժամանակվա համաժողովրդական շարժմանը աշխատել նրանց հետ և հասնել անհրաժեշտ լուծումների:
« Իհարկե, դա հնարավոր դարձավ միայն շնորհիվ համաժողովրդական շարժման ակտիվության, ժողովրդական այդ ճնշումների: Նույն բանը անելու ենք նաև մենք»,- նշել է նա:
Հարցին, թե Կոնգրեսը երբ է անցնելու ավելի վճռական գործողությունների, Զուրաբյանը պատասխանել է, թե դա հիմնված կլինի բազմաթիվ քաղաքական գործոնների վրա` վստահեցնելով, սակայն, որ «պահի ընտրության հարցում» Կոնգրեսը չի սխալվի:
Հարցին`արդյո՞ք ՀԱԿ-ը նախապատրաստվում է գալիք գարնանը նախատեսված խորհրդարանական ընտրություններին, Զուրաբյանը արձագանքել է. «Մեր մտածելակերպը հետևյալն է` մենք պետք է պատրաստ լինենք ընտրությունների ցանկացած պահի»:
Հարցին` արդյո՞ք իր ասածը նշանակում է, որ Կոնգրեսն ունի իր նախընտրական ցուցակ, նա պատասխանել է. «Համամասնական և մեծամասնական ցուցակները ներկայացնելու ժամկետ կա: Մենք այս ժամանակը ունենք և, վստահ եմ, որ մենք կկարողանանք այդ խնդիրը շատ արագ լուծել: Իսկ նախապես նման ցուցակի քննարկումներ անելը մենք նպատակահարմար չենք համարում, ուստի նման քննարկում Կոնգրեսում չի եղել»:
Ինչ վերաբերում է ընտրություններին դաշինքով մասնակցելու հնարավորությանը, ապա, ըստ Զուրաբյանի, իրենք բաց են համագործակցության համար և, իհարկե, կցանկանային համախմբել ընդդիմադիր ուժերին. այդ նպատակով պատրաստ են և՛ խոսել, և՛ բանակցել:
«Ոչ միայն չենք բացառում, այլև ուրախ կլինեինք, բայց նաև չենք ուզում կեղծ հույսեր ստեղծել», – ասել է նա:
Այդուհանդերձ, հարցին, թե իրատեսական համարում է «Ժառանգության» կան ՀՅԴ-ի նախընտրական դաշինքի ստեղծումը, Լ. Զուրաբյանը պատասխանել է. «Այս պահին, եթե ասեմ` ռեալիստական զգացում ունեմ, որ դա ռեալիստական կարող է լինել, դեռ չունեմ»: