ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ նոյեմբերի 22-ին պաշտոնական այցով Պրահայում գտնվող ՀՀ ԱԳ նախարար Էդվարդ Նալբանդյանը հանդիպել է Չեխիայի փոխվարչապետ, ԱԳ նախարար Կարել Շվարցենբերգի հետ:
Վերջինս շնորհավորել է Պրահայում Հայաստանի դեսպանության բացման կապակցությամբ` ընդգծելով, որ դիվանագիտական ներկայացուցչություն հիմնելու Հայաստանի իշխանությունների որոշումը նոր լիցք կհաղորդի հայ-չեխական համագործակցությանը:
Է. Նալբանդյանը գոհունակությամբ նշել է, որ հայ-չեխական հարաբերությունները որակապես նոր մակարդակի վրա են բարձրացել:
Նրա բնորոշմամբ` Պրահայում Հայաստանի դեսպանության բացումը վկայում է Չեխական Հանրապետության հետ բարեկամական գործընկերությունը խորացնելու և ընդլայնելու հայկական կողմի նպատակադրվածության մասին։
Նախարարները գոհունակությամբ են նշել, որ վերջին երեք տարվա ընթացքում երկկողմ 8 համաձայնագրեր են ստորագրվել:
Հայաստանի և Չեխիայի արտաքին քաղաքական գերատեսչությունների ղեկավարներն անդրադարձել են երկուստեք հետաքրքրություն ներկայացնող միջազգային և տարածաշրջանային խնդիրների:
Չեխիայի արտգործնախարարը բարձր է գնահատել Հայաստանում իրականացվող բարեփոխումները, նախարարները քննարկել են Հայաստան-ԵՄ համագործակցությունը, Արևելյան գործընկերության շրջանակներում իրականացվող ծրագրերը։
Միջգերատեսչական փոխգործակցության ակտիվացման ենթատեքստում նախարարները պայմանավորվել են ԱԳՆ-ների միջև խորհրդակցությունների ծրագիր մշակել և համագործակցություն ծավալել ՀՀ ԱԳՆ դիվանագիտական դպրոցի և Չեխիայի ԱԳՆ դիվանագիտական ակադեմիայի միջեւ:
Է. Նալբանդյանն իր չեխ գործընկերոջն է ներկայացրել Լեռնային Ղարաբաղի հիմնախնդրի կարգավորման գործընթացը։ Երկուստեք ընդգծվել է, որ հիմնախնդրի խաղաղ բանակցային կարգավորումն այլընտրանք չունի։
Նախարարների հանդիպմանը հետևել է համատեղ մամուլի ասուլիս:
Նույն օրը Է. Նալբանդյանն ու Կ. Շվարցենբերգը ներկա են գտնվել Պրահայում ՀՀ դեսպանության պաշտոնական բացման արարողությանը, որին ներկա էին Պրահայում հավատարմագրված դեսպաններ, Չեխիայի խորհրդարանի անդամներ, հայ համայնքի ներկայացուցիչներ:
Օրվա երկրորդ կեսին Է. Նալբանդյանն այցելել է Չեխիայի Սենատ, հանդիպել Սենատի նախագահի առաջին տեղակալ Պրեմիսլ Սոբոտկայի և Սենատի տարբեր քաղաքական ուժեր ներկայացնող սենատորների հետ:
Չեխ սենատորները բարձր են գնահատել Պրահայում ՀՀ դեսպանության հիմնադրումը՝ վստահություն հայտնելով, որ մշտական դիվանագիտական ներկայացուցչությունը լուրջ խթան կհանդիսանա հարաբերությունների հետագա ամրապնդման գործում:
Հանդիպմանը քննարկումներ են ծավալվել երկկողմ հարաբերությունների ամրապնդման, միջխորհրդարանական համագործակցությանն առնչվող մի շարք հարցերի շուրջ:
Նոյեմբերի 22-ի առավոտյան Էդվարդ Նալբանդյանը Հայաստանի արտաքին քաղաքականության վերաբերյալ ծավալուն ելույթով հանդես է եկել Չեխիայի Միջազգային հարաբերությունների ասոցիացիայում:
Օրվա ավարտին Հայաստանի արտգործնախարարը ՀՀ դեսպանությունում հանդիպել է Չեխիայի հայկական համայնքային կազմակերպությունների ներկայացուցիչների հետ և պատասխանեց Հայաստանի արտաքին քաղաքականության վերաբերյալ նրանց բազմաթիվ հարցերին:
Այցի շրջանակում Էդվարդ Նալբանդյանը հարցազրույց է տվել չեխական առաջատար «Լիդովե Նովիցի» թերթին: