Եվրոպական ժողովրդական կուսակցության գլխավոր քարտուղար Դենիս Օհարանը երեկ Հայաստանի կոալիցիոն երեք կուսակցությունների և «Ժառանգություն» կուսակցության հետ է հանդիպել, որոնք, ինչպես հայտնի է, հայտ էին ներկայացրել ԵԺԿ-ին՝ Եվրախորհրդարանի ամենամեծ խմբակցությունն ունեցող կուսակցությանն անդամակցելու համար:
Եվ ահա Օհարանը հայտարարել է, որ Հայաստանից, փաստորեն, բացառիկ առաջարկ է ստացվել, որ միանգամից չորս կուսակցություն ցանկանում են անդամակցել ԵԺԿ-ին: Իրականում, իհարկե, ԵԺԿ գլխավոր քարտուղարի հայտարարած բացառիկությունը մեկ այլ բանի մեջ է: Բանն այն է, որ այդ չորս կուսակցություններն են ինքնին բացառիկ, քանի որ եթե նրանց բոլորին միավորես մեկ համակարգի մեջ, ապա նույնիսկ այդ դեպքում ստացված համակարգը չի կարող կուսակցություն կազմել այդ բառի դասական իմաստով:
Այսինքն` Հայաստանից իրականում ոչ թե չորս կուսակցություն է հայտ ներկայացրել, այլ չորս կազմակերպություն, որոնք պարզապես որոշել են իրենք իրենց կուսակցություն կոչել: Մինչդեռ, իրականում, թե կալիցիոն եռյակը, թե նույնիսկ «Ժառանգությունը», հեռու են դասական իմաստով կուսակցություն համարվելուց, ինչպես ընդհանրապես Հայաստանի քաղաքական դաշտի բոլոր մյուս միավորները:
Հայաստանում ընդհանրապես կուսակցություն հասկացությունն ինքն է բացառիկ, և Դենիս Օհարանը բացառիկության մասին խոսելիս թերևս հենց դա պետք է նկատի ունենա, ոչ թե այն, որ չորս կուսակցություն է դիմել ԵԺԿ-ին անդամակցելու համար: Բանն այն է, որ Հայաստանում ոչ միայն չորս կուսակցություն չկա, այլ նույնիսկ մեկն էլ չկա, որ կարող է իսկապես կուսակցություն համարվել բառի բուն և քաղաքական իմաստով: Սա է բացառիկը, որ կարող է լինել ստեղծված իրավիճակում: Այսինքն` մի երկիր, որը ըստ էության չունի, այսպես ասած, խելքը գլխին գոնե մեկ կուսակցություն, միանգամից չորս կուսակցությամբ է հայտ ներկայացնում ԵԺԿ-ին անդամակցելու համար:
Ընդ որում` անկասկած է, որ այդ անդամակցությունից հետո Հայաստանում ոչինչ չի փոխվելու կուսակցական-քաղաքական համակարգի կայացման առումով: Այսինքն` անդամագրվելով եվրոպական քաղաքական ընտանիքի ամենամեծ կուսակցությանը, Հայաստանի կուսակցությունները ամենևին է՛լ ավելի եվրոպական կամ ավելի քաղաքական չեն դառնալու, հատկապես եթե նկատի առնենք կոալիցիոն եռյակին: ԵԺԿ-ին անդամակցելով` ՀՀԿ-ն, ԲՀԿ-ն ու ՕԵԿ-ը չեն դառնալու ավելի քաղաքական և դուրս չեն գալու այն բիզնես-պատեհապաշտական տրամաբանությունից, որում գտնվում են կուսակցության անվան տակ քողարկված լինելով և քաղաքականության շղարշի ներքո բիզնես-շահերը առաջ տանելով: