ՇՊԱԿ-ների ազգային ցանցը 2008 թվականից անվճար ծառայություն է մատուցում և մատուցելու կոռուպցիայից տուժած անձանց Հայաստանի ամբողջ տարածքում: Շահերի պաշտպանության և աջակցության կենտրոնը ֆինանսավորվում է ԱՄՆ ՄԶԳ հակակոռուպցիոն գործողությունների մոբիլիզացման ծրագրի կողմից:Մինչ օրս սպասարկել է 7000 բողոքատուի և զբաղվել տարբեր ոլորտների ավելի քան 1500 ենթադրվող կոռուպցիոն գործերով, այդ թվում՝ առողջապահության, սեփականության իրավունքի, աշխատանքի, երթևեկության և ընդհանուր հանրային ծառայությունների: ՇՊԱԿ-ներ ցանցից իրավաբանական աջակցություն ստանալու համար կարելի է զանգահարել 08 00 00 11 10 թեժ գիծ հեռախոսահամարով:
Ի դեպ, երբ զանգահարում եք այդ հեռախոսահամարով, ոչ այնքան հաճելի ձայնով մի աղջիկ նախ հարցնում է, թե ունե՞ք արդյոք ապացույց, որ ձեզնից կաշառք են ուզել, եթե պատասխանում եք` այո, ապա աղջիկը խորհուրդ է տալիս անհապաղ դիմել ոստիկանությանը, իսկ եթե ոչ, ապա խորհուրդ է տալիս նույնպես անհապաղ ճարել ապացույցներ:
Հիշեցնենք, որ թեև Հայաստանում չկա պրակտիկորեն այնպիսի մարդ, ով գոնե մեկ անգամ առնչված չլինի կոռուպցիա կոչված երևույթի հետ, պաշտոնական տվյալներն այլ բան են ասում. ըստ ՀՀ կառավարությանն առընթեր ՀՀ ոստիկանության ամփոփ տեղեկատվության՝ հանրապետությունում, ըստ առանձին հանցատեսակների խմբերի, 2010 թ. հունվար-հոկտեմբերի տվյալներով, գրանցված է կաշառք ստանալու, տալու և կաշառքի միջնորդության 53 դեպք: