Այսօր Երևանում ՆԱՏՕ-ի տեղեկատվական կենտրոնում տեղի ունեցած մամուլի ասուլիսում Հայաստանում Գերմանիայի դեսպան Հանս- Յոխեն Շմիդտը, խոսելով հայ-գերմանական ռազմական համագործակցության մասին, կարևորեց, որ վերջին 12 տարիներին երկու երկրների միջև մեծ զարգացում է գրանցվել այս ոլորտում։ «Այս ընթացքում եղել են Հայաստան-ՆԱՏՕ նպատակաուղղված հանդիպումներ, որոնք բավական լավ արդյունքներ են ունեցել: Մասնավորապես, քննարկվել է այլընտրանքային ծառայության հարցը, թեմա, որը Հայաստանի համար բավական արդիական է։ Ընդհանուր առմամբ, գնահատելի է, որ Հայաստանը հետաքրքրված է ՆԱՏՕ-ի անդամ հանդիսացող երկրների ռազմական փորձով, դա միայն շահեկան է»,- ասաց Հանս- Յոխեն Շմիդտը։
Նա նաև կարևորեց Հայաստանում հավատարմագրված ռազմական կցորդների և հայ սպաների շփումները։ «Սա, այլ հարցերից բացի, հնարավորություն է ընձեռում նրանց դեմ առ դեմ խոսել նաև ղարաբաղյան հակամարտության մասին։ Խաղաղասիրական նման նախաձեռնությունները Հայաստանին մեկ քայլ առաջ են դնում Ադրբեջանից, ավելի շահեկան վիճակ ստեղծում ձեր երկրի համար»։ Այս համատեքստում Հանս- Յոխեն Շմիդտը գովեստի խոսքեր ուղղեց Հայաստանի պաշտպանության նախարար Սեյրան Օհանյանի հասցեին: Դեսպանը նշեց, որ Հայաստանն ունի «քաղաքական մտածողությամբ» օժտված պաշտպանության նախարար, և դրա համար պետք է` «հպարտանալ նրանով»:
