ԼՂՀ «Եղնիկներ» զորամասում ծառայող զինծառայողներից մեկին բուժկետի բժիշկը չի համաձայնում տեղափոխել հոսպիտալ: Այս մասին «Առաջին լրատվական»-ին տեղեկացրեց զինծառայողի մայրը՝ Անահիտ Հարությունյանը:
Արդեն մեկուկես տարի է, ինչ ԼՂՀ «Եղնիկներ» զորամասում հայմորիտ հիվանդությամբ իր ծառայությունն է շարունակում զինծառայողը: Ինչպես տեղեկացրեց մայրը, տղային հիվանդ վիճակով զորակոչել են բանակ: «Մի քանի անգամ բուժզննում է անցել մինչ բանակ զորակոչվելը, և զինվորական հանձնաժողովը հայտնաբերել է հիվանդությունը: Տղայիս ասել են, որ գնա տաս օր բուժվի և վերադառնա, իսկ տղաս, ձանձրացած լինելով բուժումներից, դեղորայքներից, սրսկումներից, ասել է, որ չի ցանկանում բուժում անցնել ու նրան առաջարկել են փաստաթուղթ ստորագրի, որով համաձայնություն կտա հիվանդ վիճակով ծառայելուն»,- մանրամասնեց Ա. Հարությունյանը՝ ասելով որ տղայից ստորագրություն են վերցրել`հաշվի չառնելով, որ տղան ունի նաև ծնողներ:
Ծնողները տղայի երդման արարողության ժամանակ նկատել են, որ նրա առողջական դրությունը ծանր է և դիմել են բուժկետի բժշկին, ով խոստացել է, որ կտանեն հոսպիտալ և կբուժեն: Մի քանի ամիս հետո զինծառայողին տարել են հոսպիտալ, որտեղ դեղորայքային բուժում է անցել: «Դեղորայքային բուժումը նրան ոչ մի օգուտ չէր տվել, և բժիշկն ասել էր, որ երեխայի քթի միջնապատը թեք է, որն էլ հայմորիտի պատճառն է: Հոսպիտալի բժիշկը քիթը վիրահատելու պատրաստակամություն էր հայտնել: Ամեն օր զանգահարում և ասում է բուժկետի բժշկին, որ թույլտվություն տրամադրի հոսպիտալ տեղափոխելու համար»,- մանրամասնեց տղայի մայրը`հավելելով, որ բուժկետի բժիշկը դա չի անում:
Անահիտ Հարությունյանն ասաց, որ եթե առջևում ձմեռ չլիներ, ինքը գուցեև այդքան անհանգստացած չլիներ. Նա մտահոգ է, քանի որ ցուրտ ձմռանը զորամասում հիվանդությունը կարող է վերածվել մենինգիտի: Եթե տղայի վիրահատության հարցը չլուծվի, պատրաստվում է դիմել ՊՆ: «Ես չեմ կարող թույլ տալ, որ այդ վիճակով շարունակի իմ տղան ծառայել: Մի քանի անգամ բուժում է անցել, սակայն նրան վիրահատություն է անհրաժեշտ, դեղորայքային բուժումը չի օգնում»,- ցավով նշեց Անահիտ Հարությունյանը:
Անդրադառնալով «Եղնիկներ» զորամասի բուժապահովմանն`ասաց, որ տխրահռչակ է այնտեղի բուժապահովումը, որովհետև գոյություն չունի: «Եթե կարիք կա հիվանդ զինվորին տեղափոխել Ստեփանակերտի հոսպիտալ, շատ մեծ ջանքեր է պահանջում, հաճախակի փոխվում է բուժանձնակազմը, ապա թույլ չեն տալիս, որ բժիշկն ըստ պատշաճի տեր կանգնի հիվանդին, ահաբեկում են զինվորներին և այլն»,- մեկնաբանեց այն զինծառայողի մայրը:
Նշենք, որ օրեր առաջ լրագրողների հետ հանդիպման ժամանակ ՀՀ ԶՈւ ռազմաբժշկական վարչության պետ, գնդապետ Արտաշես Փարսադանյանը նշել էր, որ բանակում բուժապահովումը բարձր մակարդակի վրա է`դեռ ավելին: