Թուրք գործընկերոջ հետ հանդիպումից հետո Ֆրանսիայի ԱԳ նախարար Ալեն Ժյուպեի այն հայտարարությունը, որ իր երկիրը պատրաստակամ է հյուրընկալել Հայոց ցեղասպանության շուրջ հայ-թուրքական քննարկումները, պատահականություն չէ. նման հայտարարությունը, այն էլ՝ Ժյուպեի նման բարձրաստիճան պաշտոնյայի կողմից, կարող է միայն լուրջ քննարկումների արդյունք լինել: «Առաջին լրատվական»-ի հետ զրույցում նման տեսակետ հայտնեց Հայաստանի լիբերալ կուսակցության ղեկավար, ՀԱԿ ներկայացուցիչ Հովհաննես Հովհաննիսյանը:
«Ինձ համար շատ զարմանալի է, որ Ցեղասպանությունն օրինականորեն ընդունած երկրի ԱԳ նախարարը նման հայտարարություն է արել: Սա նշանակում է, որ ֆրանսիական իշխանության մեջ ամեն ինչ չէ, որ լավ է: Բացի այդ, թուրքական դիվանագիտությունն այս առումով բավական ինտենսիվ է աշխատում: Հայոց ցեղասպանության շուրջ հայ-թուրքական քննարկումները հյուրընկալելու մասին հայտարարությունը նպատակ ունի սիրաշահել Թուրքիային, նրա համար հարմարավետ պայմաններ ստեղծել: Քանի որ Հայոց ցեղասպանության հարցը Թուրքիայի համար ամենացավոտներից է, Ֆրանսիան ինչ-որ կերպ փորձում է լավ ժեստ անել վերջինիս: Ֆրանսիան, ցավոք սրտի, Հայաստանին չի կարևորում, Ֆրանսիան հստակ գիտի, որ հայաստանյան իշխանությունները ոչ մի բան անողը չեն, պետական ու ազգային շահեր պահողը չեն: Հայաստանը Ֆրանսիայի համար հանդես է գալիս աղքատ բարեկամի դերում, մինչդեռ Թուրքիայի հետ հարաբերություններն ավելի լուրջ են: Այնպես որ, Ժյուպեի նմանօրինակ հայտարարությունը երկու գործընկերների քննարկման արդյունքում արված հայտարարություն է: Այդ մակարդակի գործիչները պատահական հայտարարություններ չեն անում»,- նկատեց Հովհաննես Հովհաննիսյանը:
ՀԱԿ ներկայացուցչի խոսքով, Հայաստանի արտաքին քաղաքականությունը «խայտառակ ձախողված է»:
Նշենք, որ Ֆրանսիայի արտգործնախարար Ալեն Ժյուպեն Անկարայում 1915 թվականի իրադարձությունների թեման «մարտահրավեր» էր անվանել` իր երկրի պատրաստակամությունը հայտնելով հյուրընկալել դրա շուրջ հայ-թուրքական քննարկումները: