Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում տեղի ունեցավ «Գլենդել Հիլզ» ՓԲԸ-ն ընդդեմ «Սկիզբ Մեդիա Կենտրոն» ՍՊԸ-ի գործով դատական նիստը:
Դատարանը լսեց պատասխանող կողմից հրավիրված երկու վկաների` լուրի հեղինակ Արման Գալոյանին և Գյումրիի բնակիչ Մուրադ Գրիգորյանին:
Արման Գալոյանն իր ցուցմունքում նշեց, որ երբ իմացել է Անժիկ Միքայելյանի բնակարանում տեղի ունեցածի մասին, ընկերոջ՝ Մուրադ Գրիգորյանի հետ գնացել է «Մուշ-2» թաղամաս, որտեղ հավաքված են եղել դժգոհող բնակիչները: Հավաքվածներից տեղեկացել է, որ 1000 դոլար է առաջարկվել տուժած բնակչին, ընկերությունը նաև խոստացել է վերանորոգել բնակարանը, իսկ թե ով է կոնկրետ ասել՝ վկան չկարողացավ անուն-ազգանունով մտաբերել: Ինչ վերաբերում է լուրի իսկությունը ստուգելուն. նման բան եղե՞լ է, թե՞ ոչ դատարանի հարցին ի պատասխան՝ վկան ասաց, որ դա իրավապահների գործն է:
Հաջորդ վկան՝ Մուրադ Գրիգորյանը, ասաց, որ ինքը իսկապես եղել է Արման Գալոյանի հետ և տեսել է, որ բնակիչները բողոքում են: Բողոքների ընդհանուր բովանդակությանը տեղյակ է եղել, սակայն 1000 դոլար առաջարկելու մասով որևէ բան չի կարող ասել, քանի որ այդ պահին անմիջականորեն Գալոյանի կողքին չի գտնվել:
Մյուս վկաները չէին ներկայացել դատարան, և պատասխանող կողմի միջնորդությամբ դատական նիստը հետաձգվեց դեկտեմբերի 14-ին, ժամը 16-00:
Հիշեցնենք, որ «Գլենդել Հիլզը» թերթից պահանջում է 2,5 մլն դրամ և դատական ծախսերի փոխհատուցում:
