Հայաստանը առնվազն չորս անգամ շատ լավ հնարավորություն է ունեցել ճանաչելու ԼՂ անկախությունը` 1992-ին, 1994-ին` Բիշքեքի արձանագրության ստորագրման պահին, 2007 թ.՝ երբ Կոսովոյի անկախության հարցն էր առաջ եկել, և այսօր: Այս մասին այսօր հայտարարեց ԱԺ «Ժառանգություն» խմբակցության պատգամավոր Լարիսա Ալավերդյանը: Սերժ Սարգսյանի՝ Աստանայում արած այն հայտարարությունը, թե Հայաստանը կճանաչի ԼՂ անկախությունը, եթե Ադրբեջանը պատերազմ սկսի, Լ. Ալավերդյանը որակեց որպես «քաղաքական մտքի ամենաթույլ դրսևորում»: Բացի այդ, ըստ Լ. Ալավերդյանի, Սերժ Սարգսյանին դրսում ոչ ոք չէր հարցրել, թե Հայաստանը ե՞րբ կճանաչի, կամ՝ կճանաչի՞, թե՞ չի ճանաչի ԼՂ անկախությունը: Այս հարցը հնչել է հենց Հայաստանի ներսում, և, ըստ ԱԺ պատգամավորի, ներսում էլ պետք է պատասխան ստանար: Հարցին, թե արդյոք ԼՂ-ն ուզո՞ւմ էր, որ իր անկախության ճանաչման վերաբերյալ նախագիծ քննարկվի այս պահին մեր ԱԺ-ում և ընդունվի, Լ. Ալավերդյանը պատասխանեց, որ ԼՂ-ից երկու արձագանք է եղել: Առաջինը` այս տարվա սկզբին, երբ ԼՂ հասարակական կազմակերպությունները կոչ արեցին ՀՀ-ին ճանաչել ԼՂ անկախությունը, և երկրորդը` երբ ԼՂ ԱԺ-ի պատգամավորների մոտ 3/5-ը հանդես եկավ առաջարկությամբ` դիմելու ՀՀ-ին, որպեսզի ՀՀ-ն ճանաչի ԼՂ անկախությունը: Սրանից ավելին, ըստ Լ. Ալավերդյանի, ԼՂ չէր կարող անել` ցույց տալու համար, որ ժամանակն է ճանաչել ԼՂ անկախությունը: «Դուք ի՞նչ է, ուզում էիք, որ ԼՂ իշխանությունները ուղղակի ճնշու՞մ գործադրեին ՀՀ իշխանությունների վրա: Ես ԼՂ իշխանությունենրի պահվածքը համարում եմ չափազանց խոհեմ»,- ասաց Լ. Ալավերդյանը