Դեկտեմբերի 15-ին արտգործնախարար Էդվարդ Նալբանդյանն ընդունեց Հայաստան-Եվրոպական Միություն ասոցիացման համաձայնագրի բանակցություններին եվրոպական կողմի գլխավոր բանակցող Գունար Վիգանդի գլխավորած պատվիրակությանը, որը Հայաստան է ժամանել բանակցությունների 3-րդ լիագումար նիստին մասնակցելու նպատակով:
Ողջունելով հյուրերին՝արտգործնախարար Նալբանդյանը նշեց, որ տարին աննախադեպ էր Հայաստան- Եվրոպական միություն բարձրաստիճան փոխայցելություններով, քաղաքական երկխոսության բարձր մակարդակով, նաև` դրանց բովանդակային առումով:
Հայաստանի արտաքին քաղաքական գերատեսչության ղեկավարը գոհունակությամբ արձանագրեց, որ, այս տարվա հուլիսին բանակցությունների մեկնարկից ի վեր, դրանք վարվել են 14 ուղղություններով, որոնցից բանակցվել և ժամանակավորապես փակվել են 9-ը, մնացած ուղղություններով քննարկումները շարունակվում են, և ակնկալվում է քննարկումներ սկսել ևս 10 ոլորտների շուրջ:
Զրույցի ընթացքում ամփոփվեցին վերջերս կայացած Հայաստան – ԵՄ խորհրդի 11-ի նիստի, ինչպես նաև երկու օր առաջ Արևելյան գործընկերության նախարարական հանդիպման արդյունքները:
Հանդիպմանը անդրադարձ կատարվեց հաջորդ տարվա մայիսի 27-ին Բուդապեշտում կայանալիք Արևելյան գործընկերության գագաթնաժողովի նախապատրաստական աշխատանքներին:
Էդվարդ Նալբանդյանն ու Գունար Վիգանդը հանգամանալից քննարկեցին անցնող տարում համագործակցության նոր ձևաչափի շրջանակներում կատարված աշխատանքները և ուրվագծեցին ձեռնարկվելիք քայլերը, մտքեր փոխանակեցին Ասոցիացման համաձայնագրի շուրջ բանակցությունների, մուտքի արտոնագրային ռեժիմի դյուրացման, ազատ և համապարփակ առևտրի գոտու ստեղծման գործընթացների շուրջ:
Նույն օրը ԱԳՆ-ում Հայաստանի արտգործնախարարի կողմից բացվեց Ասոցիացման համաձայնագրի շուրջ բանակցությունների երրորդ լիագումար նիստը, որին մասնակցում էին Հայաստանի օրենսդիր և գործադիր մարմինների բարձրաստիճան ներկայացուցիչներ և Եվրոպական տարբեր կառույցների պաշտոնյաներ, Երևանում հավատարմագրված ԵՄ անդամ երկրների դեսպաններ: