Երկուշաբթի Միացյալ Նահանգների դաշնային դատարանը Հայոց ցեղասպանության զոհերի ժառանգների փոխհատուցման հիմնադրամի բազմամիլիոն դոլարների հետ կապված հաշվապահական անճշտությունների հարցով միմյանց հետ պայքարող փաստաբաններին երկու շաբաթ ժամանակ է տվել համաձայնության հասնելու համար:
Ինչպես հաղորդում է The Glendale News-Press պարբերականը, Միացյալ Նահանգների շրջանային դատարանի դատավոր Քրիստին Սնայդերը կարգադրել է փաստաբաններ Մարկ Գերագոսին և Ռոման Սիլբերֆելդին վերադառնալ դեկտեմբերի 5-ին`առաջարկներով, թե ինչպես են իրենք ցանկանում կարգավորել հաշվապահական անհամապատասխանությունները փոխհատուցման հիմնադրամում, որը հիմնվել է մի քանի տարի առաջ «Աքսա» ապահովագրական ընկերության կողմից` Հայոց ցեղասպանության զոհերի ժառանգներին փոխհատուցում տալու համար:
Գերագոսը խնդրել է, որպեսզի ինքը և գլենդելաբնակ Վարդգես Եղիայանի շահերը ներկայացնող Սիլբերֆելդը քննարկում անցկացնեն «փակ սենյակում», քանի որ նա հավատում է, որ իրենք կարող են համաձայնության գալ:
Պարբերականը գրում է, որ երկու կողմերի փաստաբանները և նրանց անձնակազմը ուսումնասիրել են ներկայացված 1000 բողոքներից 94-ը: Ուրբաթ միջնորդություն ներկայացնելով դատարան` Սիլբերֆելդը հայտնել էր, որ որոշ հայցվորների գումարը փոխանցվել է ոչ ամբողջությամբ: Որոշ դեպքերում էլ խնդիրներ են առաջացել գումարի կանխիկացման հետ կապված. որոշ մարդիկ բողոքել են, որ հնարավոր է եղել կանխիկացնել միայն փոքր գումար պարունակող քարտերը:
Սիլբերֆելդը նշել է, որ եթե նման անճշտություններ հայտնաբերվել են իրենց կողմից ուսումնասիրված 94 դիմումներում, ապա չի բացառվում, որ խնդիրներ կան նաև մյուս 900 բողոքների հետ կապված:
Այս տարի ավելի վաղ Գերագոսը և փաստաբան Բրայան Քաբաթեքը հայց էին ներկայացրել Եղիայանի և նրա կնոջ՝ փաստաբան Ռիտա Մահդեսյանի դեմ` նրանց մեղադրելով կեղծ բարեգործությամբ զբաղվելու և վերջին 6 տարիների ընթացքում մոտ 1 մլն դոլար ոչ նպատակային վատնելու մեջ:
Երկուշաբթի Քոբաթեքը դատավորին հայտնել է, որ «Աքսա» հիմնադրամի հետ կապված գործերով Եղիայանը փորձում է ուշադրությունը շեղել այդ դատական գործընթացից: