ՀՀ կառավարության մամլո ծառայությունից «Առաջին լրատվական»-ին տեղեկացնում են, որ վարչապետ Տիգրան Սարգսյանը այցելել է Ոստիկանության անձնագրային և վիզաների վարչության Մաշտոցի անձնագրային բաժանմունք:
Կառավարության ղեկավարը ՀՀ ոստիկանապետ Վլադիմիր Գասպարյանի ուղեկցությամբ ծանոթացել է վերանորոգումից հետո ստեղծված պայմաններին և բաժանմունքի գործունեությանը:
Քաղաքացիների սպասարկումն առավել արդյունավետ և թափանցիկ իրականացնելու համար բաժանմունքը համալրվել է անձնագրային ծառայությունների մատուցման համար նախատեսված պետական տուրքերը, վարչական տուգանքները և այլ վճարներն ընդունող էլեկտրոնային տերմինալով և համակարգչային տեխնիկայով: Նախկինում այստեղ անձնագրավարները գործառություներն իրականացրել են ըստ իրենց կողմից սպասարկվող տարածքների: Ներկայում բաժանմունք դիմած քաղաքացիներն սպասարկվելու են ըստ իրենց անհրաժեշտ ծառայությունների՝ ավելի արագ և առանց ավելորդ քաշքշուկների: Անձնագրային բաժանունքում աշխատանքները կազմակերպվել են ապակեպատ աշխատանքային խցիկներով՝ քաղաքացիների սպասարկման թափանցիկությունն ապահովելու նպատակով:
Իրականացված բարեփոխումների արդյունքում զգալիորեն կբարձրանա քաղաքացիների սպասարկման որակը և կբացառվեն կոռուպցիոն ռիսկերը:
Բաժանումքի վերանորոգման և տեխնիկական վերազինման աշխատանքներն իրականացվել են ՀՀ ոստիկանության արտաբյուջետային միջոցների հաշվին: Ընդհանուր առմամբ վերը նշված աշխատանքների իրականացման նպատակով ներդրվել է 59 մլն 642 հազար դրամ:
Այս տարի արդեն իսկ վերակառուցվել են Նոր Նորքի և Աշտարակի անձնագրային բաժանմունքները, իսկ մինչև 2011 թվականի դեկտեմբերը կավարտվեն Ավանի անձնագրային ծառայության կապիտալ վերանորոգման աշխատանքները:
