«Պաշտոնանկությունները պետք է դիտել նախընտրական արշավի տրամաբանության մեջ: Կենդանի օրգանիզմը միշտ պետք է փոփոխվի: Դա կօգնի դրական արդյունքներ գրանցել ընտրություններից առաջ»,- այսօր հրավիրված մամուլի ասուլիսին հայտարարեց ՀՀԿ պատգամավոր Կարինե Աճեմյանը:
«Ազատ դեմոկրատներ» կուսակցության փոխնախագահ Անուշ Սեդրակյանը հայտարարեց, որ պաշտոնանկությունների շղթան միտված էր ոչ այնքան քաղաքական դաշտը վերանորոգելուն, այլ իշխող կուսակցության կողմից իրականացվող վերջին քայլն էր, որ նա կարող էր անել:
Ըստ նրա` ՀՀԿ-ական մոդելը սպառել է իրեն. ցույց տրվեց, որ Հայաստանում կատարվում են համակարգային փոփոխություններ, բայց անձերի փոփոխությունը ոչ մի արդյունք չի տալիս: Անուշ Սեդրակյանը կոչ արեց ավելի թափանցիկ լինել:
Անդրադառնալով թիկնազորի և պահնորդների մասին օրենքին, որը շրջանառվում է Ազգային ժողովում, Սեդրակյանը հայտարարեց, որ Հայաստանում թիկնազորը կատարում է ծպտյալ կրիմինալի դեր. «Թիկնազորը բավական մեծ քաղաքական գործոն է»:
Կարինե Աճեմյանը հայտարարեց, որ Հայաստանում թիկնազորի ինստիտուտը չարաշահվում է, նրա խոսքով` օրենքը մինչև ընտրությունները կընդունվի:
Ըստ օրենքի` պաշտոնյաները իրավունք չունեն օգտվել թիկնազորից, ինչպես պատգամավորները` զբաղվել բիզնեսով: «Եթե օրենքները կյանքի կոչենք, կունենանք այն պատգամավորը, որ ես և դուք երազում ենք»:
