Թուրքական Internet Haber կայքի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) փաստացի առաջնորդ Մուրադ Քարայըլանը Roj TV հեռուստաալիքին տված հարցազրույցի ժամանակ Սիրիայի քրդերին կոչ է արել զինվել.
«Մենք մերձավորարևելյան տարածաշրջանում ընթացող ժողովրդական ապստամբություններն արդար ենք համարում և աջակցում ենք դրանց։ Սակայն արտաքին ուժերը շարունակ միջամտում են դրանց՝ առաջ քաշելով իրենցից կախված ռեժիմներին։ Այդպես մշտապես է պատահում, երբ ժողովրդին չի հաջողվում հաստատել ժողովրդավարություն։ Տարածաշրջանն այլևս չի լինի նախկինը, այն թևակոխել է զարգացման նոր ժամանակաշրջան։
Մերձավոր Արևելքի ժողովուրդների մեջ ամենաշատ տուժած ազգը քրդերն են։ Քրդական տարածքները բաժանվել են 4 մասի։ 90 տարի շարունակ ժխտվում էր նրանց նույնականությունը և նրանց դեմ կյանքի բոլոր ոլորտներում մղվում էր ոչնչացնող քաղաքականություն։ Եթե հարցնեն, թե որ ժողովրդին է ամենից առաջ պետք ժողովրդավարությունը, ապա անկասկած առաջինը պետք է նշվի քրդերի անունը։
Չնայած արտաքին ուժերի միջամտության բոլոր փորձերին՝ մոտենում է տարածաշրջանի ժողովուրդների կողմից իրական ժողովրդավարության ձեռքբերման օրը։ Այդ գործընթացը գլխավորելու են քրդերը։ 1945-1963 թվականներին քանիցս փոխվել են սիրիական ռեժիմները, սակայն դրանից քրդերն առավելություն չստացան։
Այժմ քրդերը հնարավորություն են ստացել վերականգնելու իրենց օրինական իրավունքները ու ճանաչվելու որպես ժողովուրդ։ Սիրիայի 1.5 միլիոն քրդերը չպետք է հարեն ո՛չ սիրիական, ո՛չ էլ թուրքական իշխանություններին։ Նրանք պետք է զենք վերցնեն ու ինքնապաշտպանություն կազմակերպեն»։
Հիշեցնենք, որ առավել վաղ նշվում էր, թե Սիրիայի նախագահ Բաշար Ալ-Ասադը պատրաստվում է Թուրքիայի վարչապետ Էրդողանի դեմ կիրառել քրդական խաղաքարտը։
