Նախօրեին քաղբանտարկյալ Նիկոլ Փաշինյանի փաստաբան Վահե Գրիգորյանը այցելել էր «Արթիկ» ՔԿՀ, որտեղ ՔԿՀ վարչությունը հնարավորություն չէր տվել վերջինիս առանձնատեսակցություն ունենալ Փաշինյանի հետ: Փաստի առնչությամբ Գրիգորյանը կազմել և տարածել էր արձանագրություն, որից հետո ի պատասխան բավականին ուշագրավ մի հաղորդագրությամբ էր հանդես եկել արդարադատության նախարարության ՔԿՎ մամլո ծառայությունը: «Արձանագրությունում» տեղ են գտել իրար հակասող մի շարք տեղեկություններ, որոնց համադրումը հիմք է՝ պնդելու, որ «արձանագրություն» կազմողներն այս անգամ էլ զերծ չեն մնացել իրենց վառ երևակայությունը իրականության փոխարեն հանրությանը ներկայացնելուց: Այսպես, ըստ այդ «արձանագրության», դատապարտյալի հետ պաշտպանի տեսակցության ընթացքում ՀՀ ԱՆ «Արթիկ» ՔԿՀ-ում իբր թույլ են տրվել խախտումներ: Դատապարտյալն ու իր պաշտպանն այդ «խախտումը» նկարագրել են այնպիսի գործողությամբ, որը ոչ այլ ինչ է, քան քրեակատարողական հիմնարկների ներքին կանոնակարգի պահանջների կատարում, համաձայն որի՝ տեսակցության ընթացքում ՔԿՀ-ի հսկողությունը պարտադիր է»,- գրել է ԱՆ ՔԿՎ մամլո ծառայությունը: Փաստաբան Երվանդ Վարոսյանը, «Առաջին լրատվականի» հետ զրույցում մեկաբանելով այս հայտարարությունը, ևս մեկ անգամ հիշեցրեց ԱՆ համապատասխան կառույցներին. «Պաշտպանն ունի առանձնատեսակցության իրավունք, դա քննարկման ենթակա չէ, և ոչ մի արգելք դրան չի կարող լինել»: «Մենք արդեն սովորել ենք,որ ՔԿՀ-ն օրենքները մեկնաբանում է ըստ իր հայեցողության: Ընդ որում, երբեմն մեջ են բերում ինչ-որ ներքին կանոնագրքեր, որոնք օրենքներին և Սահմանադրությանը հակասում են, էլ չենք ասում` Եվրոպական կոնվեցիային: Եվ այն սարկազմը, որ կա այդ հայտարարության մեջ, թե արձանագրության մեջ Վահե Գրիգորյանը մեջբերումներ է արել օրենքներից, եվրոպական կոնվեցիայից, խոսում է այն մասին, որ նրանք ուղղակի այդ օրենքներից տեղյակ չեն»,- նշեց Վարոսյանը:
