Նոյեմբերի 17-20-ը Ֆրանսիայում տեղի է ունեցել «Հայաստան» համահայկական հիմնադրամի 12-րդ դրամահավաք հեռախոսամարաթոնը, որի արդյունքում ավելի քան 1 միլիոն 300 հազար եվրոյի խոստում է գրանցվել:
Ֆրանսիայի հինգ քաղաքներից` Փարիզ, Լիոն, Մարսել, Նիցցա և Թուլուզ, ձեռնարկին միացած շուրջ 700 կամավորները 12 ժամ շարունակ զանգահարել են ընդհանուր առմամբ 60000 հայազգի ընտանիքի ու կազմակերպության` առաջարկելով իրենց նվիրատվություններով մասնակցել Հայաստանի ու Արցախի վերականգնմանն ուղղված նախաձեռնությանը:
Հիմնադրամի Ֆրանսիայի տեղական մարմնինը տեղի հայ համայնքի հանգանակած 1 միլիոն 173 հազար եվրո գումարով ջրամատակարարման ծրագրեր կիրականացնի Արցախի ու Հայաստանի Տավուշի մարզի մոտ 10 գյուղում:
Շվեյցարիայի տեղական մարմինը շվեյցարահայերի կողմից հանգանակած 24150 եվրոն կօգտագործի նորոգելու Երևանի Չայկովսկու անվան երաժշտական դպրոցը և համալրելու դպրոցի գրադարանը:
Գերմանիայի տեղական մարմինը գերմանահայերի 81360 եվրոյի նվիրատվություններով կնորոգի Գյումրու մանկատունը:
Համաեվրոպական հեռախոսամարաթոնին Հունաստանից մասնակցել է նաև հունահայ համայնքը:
Չնայած Հունաստանում տիրող տնտեսական ու քաղաքական բարդ իրավիճակին` հունահայ փոքրաթիվ համայնքը շուրջ 35.000 եվրո է հանգանակել, որը կուղղվի Վանաձորի մանկատան կարիքներին:
Հիմնադրամի Ֆրանսիայի տեղական մարմինը հեռախոսամարաթոն է կազմակերպում` սկսած 2000 թվականից:
4 օր 12 ժամ շարունակ ամենատարբեր տարիքի ու զբաղմունքի հայ և այլազգի կամավորներ զանգահարում են մասնակից երկրներում բնակվող հայ ընտանիքներին և կոչ անում մասնակցել Հայաստանի և Արցախի վերածննդին ուղղված դրամահավաքին:
Առաջին հեռախոսամարաթոնի ընթացքում 2907 խոստման արդյունքում հավաքագրվել էր 216.500 եվրոյին համարժեք ֆրանկ:
Նախորդ 11 հեռախոսամարաթոնի ընթացքում ընդհանուր առմամբ արվել է 411.285 զանգ, և 20.800 նվիրատուի կողմից նվիրաբերվել 9.938.000 եվրո:
Հավաքագրված գումարը ներդրվել է Հայաստանի և Արցախի ենթակառուցվածքների բարեկարգման ոլորտում: