Ադրբեջանական Salam News լրատվական գործակալության փոխանցմամբ՝ Ադրբեջան այցելած Թուրքիայի Ազգային մեծ ժողովի (ԹԱՄԺ) արտաքին կապերի հանձնաժողովի նախագահ, իշխող «Արդարություն և զարգացում» կուսակցության (ԱԶԿ) ներկայացուցիչ, Ստամբուլից ընտրված պատգամավոր Վոլքան Բոզքըրը Բաքվում լրագրողներին հայտարարել է, որ 2009 թվականի հոկտեմբերի 10-ին Ցյուրիխում ստորագրված հայ-թուրքական արձանագրությունները չեն քննարկվելու ԹԱՄԺ-ում։
Բոզքըրն ընդգծել է, որ թուրք-ադրբեջանական հարաբերությունները գտնվում են բարձր մակարդակի վրա, և որ երկու երկրների միջև «երբեք» չեն կարող խնդիրներ ծագել.
«Թուրքիան և Ադրբեջանը միջազգային կառույցներում հանդես են գալիս որպես միասնական պետություն։ Երկու երկրներն ունեն կարևոր նախագծեր։ Ադրբեջանն ընտրվել է ՄԱԿ ԱԽ ժամանակավոր անդամ, և Թուրքիան հպարտ է դրանով։
Երբ աշխարհում տիրում է տնտեսական ճգնաժամ, Ադրբեջանի նման երկրի համար շատ դժվար էր ՄԱԿ ԱԽ ժամանակավոր անդամ ընտրվելը։ Բաքվում մենք կքննարկենք ՄԱԿ ԱԽ-ում Թուրքիայի ու Ադրբեջանի հետագա համատեղ քայլերը»։
Հիշեցնենք, որ այն բանից հետո, ինչ Թուրքիան ու Ադրբեջանը հոկտեմբերի 25-ին Իզմիրում կնքեցին գազային համաձայնագրերի փաթեթ, ԹԱՄԺ-ում հայ-թուրքական արձանագրությունների վավերացման հավանականությունը դարձավ աննշան։