Իրանական ISNA լրատվական գործակալության փոխանցմամբ՝ Թեհրանի թիվ 76 դատարանը մեկ տարվա ազատազրկման է դատապարտել մամուլի հարցերով Իրանի նախագահի խորհրդական Ալի Աքբար Ջավանֆեքրին։ Այդ պատժաժամկետի կեսը վերաբերում է «իսլամական արժեքներին հակասող նյութերի տարածմանը», իսկ մյուս կեսը՝ «հասարակական բարոյականության խախտմանը»։
Բացի այդ, դատարանին որոշմամբ՝ նախորդ տարվա հունվարից ցայժմ իրանական առաջատար Irna լրատվական գործակալության ղեկավար Ջավանֆեքրը եռամյա ժամկետով զրկվել է հրատարակչական և լրագրողական գործունեություն վարելու իրավունքից։
Նշվում է, որ իրանական դատարանն օրինախախտում է հայտնաբերել «Խաթուն» թերթի հրապարակումներում, որի գլխավոր խմբագիրը Ջավանֆեքրն էր։ Թերթի համարներից մեկում հրապարակվել էր մշակութային հարցերով Իրանի նախագահի նախկին խորհրդական Մեհդի Կահլորի հետ հարցազրույցը։
Դրանում Կահլորը քննադատության է ենթարկել իսլամական կանացի հանդերձանքի սև գույնը՝ ընդգծելով, որ այն ներմուծվել է եվրոպացիների կողմից շահական Պարսկաստանի ժամանակ։ Ըստ Կահլորի՝ եվրոպացիներն ավանդաբար սև կոստյում են կրել՝ ցոփ երեկույթներին մասնակցելու համար։
Բացի այդ, թերթը հրապարակել էր մի շարք հայտնի մարզիկների ու դերասանների լուսանկարներ, ինչպես նաև ծաղրանկարներ, ինչը դատարանը որակել է որպես «իսլամական արժեքների խախտում»։ Այժմ Ջավանֆեքրն իր տրամադրության տակ ունի 20 օր՝ հիշյալ դատավճիռը բողոքարկելու համար։
Հիշեցնենք, որ 2012 թվականի մարտին Իրանում տեղի են ունենալու խորհրդարանական ընտրություններ, և այս ամենը տեղի է ունենում դրանից 6 ամիս առաջ։
Ի դեպ, այս տարվա ապրիլից թեժ պայքար է ընթանում պահպանողականների ու նախագահ Մահմուդ Ահմադինեժադի մերձակա շրջապատի միջև։ Պահպանողական շրջանակների ներկայացուցիչները կարծում են, որ նախագահական վարչակազմը ձևավորել է ռևիզիոնիստական շարժում, որը ձգտում է հասնել իրանական հանրության շրջանում հոգևորականության դիրքերի թուլացմանը։
