Հենց նոր հայտնի է դարձել, որ Խոդորկովսկու գործով այսօր նշանակված դատական նիստը հետաձգվել է մինչև դեկտեմբերի 27-ը: Պատճառներն անհայտ են: Հիշեցնենք, որ այսօր դատավորը պետք է կարդար այս գործով դատարանի կայացրած վճիռը: Հետաձգման մասին չեն իմացել նաև փաստաբաններն ու լրագրողները, որոնք արդեն հոծ բազմությամբ հավաքված են եղել դատարանի մուտքի առաջ: Մոսկվայի Խամովնիչեսկի դատարանը չի մեկնաբանել դատարանի այս որոշումը:
Այսօր նաև հայտնի է դարձել, որ հայտնի ռուս ռոք երաժիշտները, Բորիս Գրեբենշիկովի գլխավորությամբ, դիմել են ՌԴ նախագահին` Խոդորկովսկու գործով պահանջելով արդար դատավարություն: Արդյոք այս կո՞չն է դատարանի որոշման հրապարակումը հետաձգելու պատճառը՝ այս պահին անհայտ է:
Սակայն շատ փորձագետներ նշում են, որ Մեդվեդևի իշխանության համար սա փորձաքար է` կա՛մ նա ապահովում է արդար դատավարություն, կա՛մ ցույց է տալիս, որ մարդու իրավունքների վերաբերյալ Մեդվեդևի շուրթերից պարբերաբար հնչող խոսքերը չեն ապացուցվում գործով: