Կին գործարար Սիլվա Համբարձումյանը կտրականապես հերքում է լրատվամիջոցներից մեկում հրապարակված այն տեղեկատվությունը, որ ինքը մտերիմ հարաբերությունների մեջ է եղել և հողային գործարքներ կատարել Արարատի նախկին մարզպետ Վարդգես Հովակիմյանի հետ: Այս մասին նա ասաց «Առաջին լրատվական»-ի հետ զրույցում:
Նշենք, որ ըստ լրատվամիջոցի հրապարակած նյութի՝ Սիլվա Համբարձումյանի համար մարզպետը և նրա ենթակաները միտումնավոր գնացել են կեղծման և պետական հողատարածքը տրամադրել կին գործարարի ղեկավարած ընկերությանը` 99 տարի ժամկետով արտադրություն իրականացնելու համար:
«Մենք իրար հետ որևէ կապ չունենք: Թերթում աճուրդ է հայտարարվել, ես անգամ քաղաքում չեմ եղել: Իմ աշխատողները լիազորագիր են տվել մեկին, նա մասնակցել վերցրել է: Ինձ հարյուր տեղ կանչել են, ես բացատրություններ եմ տվել: Ես Հովակիմյանին, գիտեք, որ թվից չեմ տեսել՝ 85 թվականից: Ոչ շփվել եմ հետը, ոչ տեսել եմ, երբեք նրա հետ հողային գործարքներ չեմ ունեցել: Ամեն ինչ ուզում են անեն՝ իմ վրա ցեխ շպրտելու համար, բայց այդ ցեխը գնում է իրենց վրա»,- ասաց Սիլվա Համբարձումյանը:
Հիշեցնենք, որ հայաստանյան լրատվամիջոցներից մեկն իր հրապարակման մեջ գրել էր, որ Արարատի նախկին մարզպետը և նրա ենթակաները միտումնավոր գնացել են կեղծման և պետական հողատարածքը տրամադրել Սիլվա Համբարձումյանի ղեկավարած ընկերությանը` 99 տարի ժամկետով արտադրություն իրականացնելու համար: