Իսրայելը ցանկացած պահի կարող է հարձակվել Իրանի վրա, սակայն այդ երկրում նաև լավ են գիտակցում, որ Իրանի կողմից պատասխան հարվածը չի ուշանա: «Առաջին լրատվական»-ի հետ զրույցում այս մասին հայտնեց իրանագետ Գոհար Իսկանդարյանը:
«Իրանի վրա հարձակում կատարելու մասին Իսրայելի հայտարարությունները նոր չեն. Իսրայելն այդ մասին պարբերաբար հայտարարում է 2002 թվականից, երբ հայտնի դարձավ Իրանի միջուկային ծրագրի մասին: Ճիշտ է, այժմ ավելի են ակտիվացել այն խոսակցությունները, որ Իսրայելը, չսպասելով ԱՄՆ-ին և ՆԱՏՕ-ին, կռմբակոծի Իրանը: Սկզբունքորեն, այո, Իսրայելը կարող է հարվածել Իրանին, պարզապես խնդիրն այն է, որ Իսրայելը գիտակցում է՝ պատասխան հարված կլինի: Իրանն ունի մինչև Իսրայելի տարածք հասնող հրթիռներ, բայց 2008 թվականին ԱՄՆ-ը Իսրայելին, կարելի է ասել, հակաօդային պաշտպանություն նվիրեց: Բացի այդ, Իրանը կարող է մեկ այլ մարտավարություն էլ կիրառել: Իրանում գործունեություն ծավալող, այսպես կոչված, նահատակների խումբը կարող է շատ հանգիստ ահաբեկչություններ իրականացնել Իսրայելի տարածքում»,- նկատեց իրանագետը:
Անդրադառնալով Իրանի վրա հնարավոր հարձակման դեպքում Հայաստանի դիրքորոշման հարցին՝ Գոհար Իսկանդարյանը նշեց, որ մեր երկիրն այդ դեպքում ոչ մի դիրքորոշում էլ չի կարող ունենալ: «Հայաստանն այստեղ, անխոս, չեզոք է մնալու: Երբ մի երկիր հարվածում է մեկ այլ երկրի, Հայաստանը չի կարող պաշտպանել վերջինիս: Նրան չեն լսի, եթե անգամ, ասի, որ ռազմական միջոցների կիրառումը ճիշտ չէ և ավելի լավ է խնդրի լուծման հասնել քննարկումների միջոցով: Հայաստանը միայն կարող է կոչ անել, որ խաղաղ բնակչությանը չվնասեն և խնդիրը կարգավորեն բանակցությունների միջոցով»,- ասաց Գոհար Իսկանդարյանը: