Երևանի նկատմամբ ընդհանուր փիլիսոփայությունը պետք է փոխվի, որովհետև Երևանի գերակա խնդիրը չպետք է զուտ բիզնես-ծրագրերի իրականացումը լինի: «Առաջին լրատվական»-ի հետ զրույցում նման տեսակետ հայտնեց Երևանի նախկին քաղաքապետ, Հայ ազգային կոնգրեսի ներկայացուցիչ Սուրեն Աբրահամյանը՝ անդրադառնալով Երևանի նոր քաղաքապետ Տարոն Մարգարյանի ծրագրային առաջնահերթություններին:
«Նոր քաղաքապետի համար գերակայություն պետք է լինի երևանցին իր հոգսերով: Պետք է փիլիսոփայությունը փոխվի, և ամեն բան ի շահ Երևանի ու երևանցու լինի»,- շեշտեց Աբրահամյանը:
Հարցին՝ կհաջողվի Տարոն Մարգարյանին փոխել Երևանի նկատմամբ «ընդհանուր փիլիսոփայությունը», ՀԱԿ ներկայացուցիչն ասաց. «Չեմ ուզում ի սկզբանե բայղուշությամբ զբաղվել, բայց ամեն դեպքում իմ ցանկությունն այն է, որ հանուն այս քաղաքի՝ պետական չինովնիկների վերաբերմունքը այս քաղաքի հանդեպ փոխվի: Տա Աստված, որ այդ ամենը Տարոն Մարգարյանից սկսի»,- ամփոփեց Սուրեն Աբրահամյանը:
Հիշեցնենք, որ Երևանի քաղաքապետարանում, այսօր` նոյեմբերի 18-ին, կայացել է նորընտիր քաղաքապետ Տարոն Մարգարյանի պաշտոնակալման արարողությունը: Պաշտոնակալման արարողությանը մասնակցել են Հայաստանի վարչապետ Տիգրան Սարգսյանը, փոխվարչապետ Արմեն Գևորգյանը, արտգործնախարար Էդվարդ Նալբանդյանը, կառավարության, Երևանի ավագանու անդամներ, հայտնի մտավորականներ:
Հիշեցնենք նաև, որ նախկին քաղաքապետ Կարեն Կարապետյանը հոկտեմբերի վերջին հրաժարական տվեց, և Տարոն Մարգարյանը դարձավ Երևանի 54-րդ քաղաքապետը:
