Ռազմավարական և ազգային հետազոտությունների հայկական կենտրոնի ղեկավար Ռիչարդ Կիրակոսյանը ՌԱՀՀԿ-ում կազմակերպված քննարկման ժամանակ տեղեկացրեց, որ «WikiLeaks» կայքը նախ հրապարակել է զինվորական գաղտնի փաստաթղթեր, իսկ հետո` դիվանագիտական: Նա ասաց, որ միայն իրաքյան պատերազմին վերաբերող գրեթե 400 հազար փաստաթուղթ է հրապարակվել: Ըստ Ռիչարդ Կիրակոսյանի` այդ երկու փաթեթները նույն աղբյուրն է տրամադրել: «Ինչպես Աֆղանստանի, այնպես էլ իրաքյան պատերազմին վերաբերող փաթեթները, նաև` դիվանագիտական վերջին փաթեթները տրամադրել են ԱՄՆ զինվորական աղբյուրները»,- ասաց Ռիչարդ Կիրակոսյանը: Նա հիշեցրեց, որ «WikiLeaks»-ը համագործակցում է չորս խոշոր մեդիա կազմակերպությունների հետ, որոնք գտնվում են Մեծ Բրիտանիայում, Ֆրանսիայում, Իսպանիայում, Գերմանիայում: «WikiLeaks»-ի հրապարակած փաստաթղթերը, Ռիչարդ Կիրակոսյանի հավաստմամբ, չեն պարունակում որևէ գաղտնիք: Նրանք նաև ՌԱՀՀԿ ղեկավարի հավաստմամբ, սպառնալիք չեն ազգային անվտանգությանը: «Մեզնից շատերը գիտեն, որ Բեռլուսկոնին սիրում է երիտասարդ աղջիկների, շատերը գիտեն նաև Մեդվեդևի և Պուտինի հարաբերությունների մասին»,- ասաց ՌԱՀՀԿ ղեկավարը: Միևնույն ժամանակ Ռ. Կիրակոսյանը նշեց, որ նոր տեխնոլոգիաների կիրառումը ցույց է տալիս պետության խոցելիությունն` իր անվտանգությունն ապահովելու տեսանկյունից: